Portal IGVS

O solo residencial, xunto co empresarial e as vivendas é a base da actividades do IGVS. A obtención do solo necesario de uso residencial constitúe un aliciente fundamental, partindo sempre da necesidade de establecer os mecanismos necesarios para garantir tanto a flexibilidade para adquirilo, como a eficacia e eficiencia na súa xestión.
 
A adquisición e transformación urbanística para uso residencial constitúe un dos piares fundamentais para que o IGVS e as empresas interesadas poidan construír vivenda protexida, incluso vivenda protexida destinada ao alugueiro.

Ao igual que o solo empresarial, unha vez aprobados os instrumentos urbanísticos correspondentes adquírese o solo do ámbito, dando a posibilidade, mediante a correspondente oferta pública, de adquirilo por mutuo acordo ou permuta. Dado que o IGVS goza de potestade expropiatoria forzosa, en virtude do artigo 4.2 da Lei 3/1988, do 27 de abril, da súa creación, o restante solo será adquirido por este método, actuando como Administración expropiante en beneficio seu ou, de ser o caso, da entidade que a promova.

As parcelas resultantes do solo urbanizado serán ofertadas ás construtoras ou cooperativas, mediante o correspondente concurso público de adxudicación. O IGVS resérvase nestes ámbitos parcelas para construír vivenda de protección oficial para ser destinada ás persoas máis necesitadas e con poucos recursos.

Uns dos obxectivos do IGVS para os vindeiros anos é potenciar a construción de vivenda protexida en alugueiro polo que tratará nos concursos de adxudicación de solo da súa titularidade de primar as ofertas que se presenten para este fin, incluso coa posibilidade de adxudicación do solo en dereito de superficie cun canon adecuado e por un período suficiente que garanta a viabilidade da actuación proposta.