A vivenda protexida de promoción pública (VPP) é aquela que promove ou cualifica o Instituto Galego da Vivenda e Solo e que cumpre os requisitos regulamentarios, sendo adxudicada mediante procedemento regrado.
Só poden ser persoas adxudicatarias persoas físicas que cumpran os requisitos establecidos, e estas vivendas deberán destinarse exclusivamente a domicilio habitual e permanente, quedando prohibido o seu uso como segunda residencia ou para calquera outro distinto, agás nos supostos excepcionais previstos regulamentariamente para atender necesidades especiais.
A promoción pública pode realizarse mediante diversas fórmulas, entre as que destacan a construción directa de vivendas novas polo Instituto Galego da Vivenda e Solo (IGVS), a adquisición de vivendas novas ou en construción, a adquisición de vivendas para a súa rehabilitación, a recuperación de vivendas do patrimonio do IGVS, outras formas de adquisición, a cualificación de vivendas promovidas por outros promotores públicos e a promoción concertada con promotores públicos ou privados, que dá lugar ás vivendas de promoción pública concertadas.
As vivendas de promoción pública concertadas son aquelas promovidas por outros promotores públicos ou privados pero cualificadas como tales polo IGVS para atender a demanda existente en determinados concellos. Estas vivendas adxudícanse entre persoas inscritas no Rexistro Único de Demandantes e están sometidas ao mesmo réxime xurídico que as promovidas directamente polo IGVS.
En relación coa xestión con fins de inserción ou asistenciais, o IGVS pode colaborar con administracións públicas ou entidades sen ánimo de lucro para destinar vivendas a persoas con especiais necesidades sociais, así como para xestionar promocións mediante programas de acompañamento social, mediación veciñal e xestión económica das vivendas.
O acceso ás vivendas de promoción pública pode realizarse a través de distintos títulos xurídicos, como a compravenda, o arrendamento, o dereito de superficie, o acceso diferido á propiedade ou o arrendamento con opción de compra. A adxudicación réxese polos principios de obxectividade, transparencia, publicidade e concorrencia, quedando prohibido o subarrendamento ou a cesión do uso, agás nas excepcións previstas regulamentariamente. Excepcionalmente, as administracións públicas e as entidades sen ánimo de lucro poden adquirir estas vivendas por razóns de interese público ou social. Nas segundas transmisións será obrigatorio acreditar que a vivenda está totalmente pagada e que o contrato foi visado polo IGVS.
Por último, regúlase a copropiedade nas vivendas de promoción pública como unha fórmula para facilitar o acceso á vivenda. A participación da Administración non poderá superar o 40 % do custo da vivenda, correspondéndolle á persoa adxudicataria os gastos de conservación e mantemento. A persoa beneficiaria poderá adquirir en calquera momento a parte da Administración, manténdose o réxime de vivenda protexida mentres dure a copropiedade e someténdose a transmisión da cota ás mesmas limitacións que as vivendas de promoción pública.
O parque público autonómico de vivendas está formado por vivendas e aloxamentos promovidos ou adquiridos polo Instituto Galego da Vivenda e Solo ou por entidades participadas maioritariamente polo sector público autonómico, así como por vivendas protexidas construídas en solo público autonómico mediante dereito de superficie.
As persoas adxudicatarias de vivendas de promoción pública deberán cumprir os deberes de uso, conservación e mantemento, conforme á normativa aplicable, e estarán obrigadas a contratar un seguro mínimo contra incendios. Para facilitar a xestión dos edificios, o IGVS promoverá a constitución de comunidades de persoas propietarias ou xuntas administradoras, cuxa organización e funcionamento se determinarán regulamentariamente.
A contraprestación económica derivada da adxudicación destas vivendas ten a consideración de ingreso de dereito público, sendo esixible nos prazos fixados contractualmente. En caso de impago, a débeda poderá reclamarse con xuros e mediante o procedemento de constrinximento, sen prexuízo dos recursos que procedan. Excepcionalmente, o IGVS poderá conceder aprazamentos ou fraccionamentos de pagamento cando exista unha situación transitoria de dificultade económica debidamente acreditada.
Por último, os locais e servizos complementarios situados en edificios de promoción pública poderán destinarse a usos de interese público ou comunitario, podendo cederse de forma gratuíta ou onerosa, especialmente a entidades de servizos sociais. Nos locais arrendados que requiran obras de acondicionamento, o IGVS poderá establecer un período de carencia no pagamento da renda de ata tres anos.
Promocións de VPP en execución
Co obxecto de facilitar o acceso ao financiamento das actuacións de promoción pública de vivenda en Galicia, o Instituto Galego da Vivenda e Solo (IGVS) aprobou un convenio marco coa Sociedade de Vivenda Pública de Galicia, S.A. (Vipugal) e coas entidades financeiras que se adhiran a el. Este convenio establece as condicións xerais de colaboración para o financiamento da promoción, construción e adquisición de vivendas de promoción pública, contribuíndo ao desenvolvemento do parque público de vivenda e favorecendo o acceso da cidadanía a unha vivenda digna e adecuada.
O convenio regula, por unha banda, o financiamento das promocións de vivendas de promoción pública impulsadas polo IGVS ou por Vipugal mediante préstamos hipotecarios destinados á súa construción e, por outra, a subrogación das persoas adxudicatarias nestes préstamos para facilitar a adquisición das vivendas. Así mesmo, establece as condicións mínimas dos préstamos, as obrigas das entidades financeiras e das entidades promotoras, a documentación necesaria, as garantías aplicables e os mecanismos de seguimento e coordinación entre as partes asinantes.
As entidades financeiras interesadas en participar neste sistema de colaboración poderán solicitar a adhesión ao convenio mediante a presentación da correspondente solicitude ante o IGVS. Unha vez formalizada a súa adhesión, pasarán a formar parte da relación de entidades colaboradoras para o financiamento das actuacións previstas no convenio, nas condicións establecidas nel. Ata o momento, teñen formalizada a súa adhesión:
Abanca
Banco Sabadell
Caixa Rural Galega
Banco Santander
Este instrumento de colaboración pretende reforzar a cooperación entre a Administración autonómica e o sector financeiro para impulsar a construción de vivenda pública, facilitar o acceso ao crédito das persoas adxudicatarias e contribuír ao cumprimento das políticas públicas de vivenda da Xunta de Galicia.
Normativa relacionada
Normativa relacionada
Decreto 253/2007 do 13 de decembro, de réxime xurÍdico do solo e das edificacións promovidas polo Instituto Galego da Vivenda e o SoloLei 8/2012, do 29 de xuño, de vivenda de GaliciaLei 8/2012, do 29 de xuño, de vivenda de Galicia (versión consolidada)RESOLUCIÓN do 22 de xaneiro de 2025 pola que se fai público o Acordo do Consello da Xunta de Galicia do 20 de xaneiro de 2025 polo que se determinan os ingresos para acceder ás vivendas protexidaRESOLUCIÓN do 2 de marzo de 2026 pola que se fai público o Acordo do Consello da Xunta de Galicia, do 23 de febreiro de 2026, polo que se fixan os prezos máximos de venda e renda das vivendas protexidas de promoción pública, se determinan as zonas xeográficas para a fixación dos prezos das vivendas protexidas e se modifica o Acordo do Consello da Xunta de Galicia, do 10 de xuño de 2024, polo que se fixan os prezos máximos de venda e renda das vivendas protexidas de protección autonómica en primeira ou posteriores transmisiónsRESOLUCIÓN do 6 de maio de 2026 pola que se fai público o Acordo do Consello da Xunta de Galicia, do 4 de maio de 2026, polo que se determinan os ingresos para acceder ás vivendas protexidas e se fixan os seus prezos máximos de venda e renda
Documentos relacionados
Ingresos ponderados para o acceso ás vivendas protexidas
Ligazóns relacionadas
VI409B - Cambio de réxime de alugamento a compravenda e de compravenda a alugamento de vivendas protexidas de promoción pública. VI409C - Autorización de amortización anticipada total de vivenda protexida de promoción pública. VI409D - Autorización de amortización anticipada parcial de vivenda protexida de promoción pública.
