Vivenda de Protección Autonómica (VPA)

Que se entende por VPA?

Son vivendas de protección autonómica (VPA) as vivendas protexidas promovidas por un promotor público ou privado en execución das políticas públicas de vivenda e que, cumprindo os requisitos que se establezan regulamentariamente, sexan cualificadas como tales polo Instituto Galego da Vivenda e Solo.
Tamén son vivendas de protección autonómica (VPA) as promovidas para uso propio por comunidades de persoas propietarias, cooperativas de vivendas, asociacións legalmente constituídas ou por unha persoa individual, co fin de que constitúan a súa residencia habitual e permanente, e que sexan cualificadas como tales polo Instituto Galego da Vivenda e Solo.

Cal é o seu réxime xurídico?

Unicamente as persoas físicas poderán ser adxudicatarias e usuarias das vivendas de protección autonómica.
Regulamentariamente determinaranse os tipos de vivendas de protección autonómica e o réxime xurídico destas.

Que excepción contempla a lei para as VPA?

Transcorridos tres anos desde a cualificación definitiva das vivendas de protección autonómica e ante a imposibilidade de adxudicalas por falta de persoas demandantes, o promotor poderá solicitar ao Instituto Galego da Vivenda e Solo a excepción dos requisitos de acceso, total ou parcial.
Esta autorización estará condicionada a que as vivendas se destinen a domicilio habitual e permanente, se manteñan os prezos máximos de venda ou renda durante o réxime de protección e se devolvan as axudas públicas percibidas, debendo constar expresamente na resolución de cualificación definitiva.

Normativas relacionadas

Documentos relacionados