VolverTrabada suma unha nova vivenda municipal rehabilitada co apoio da Xunta para dedicar a alugueiro accesible
O delegado territorial, Javier Arias, explica que o Goberno galego destinou 174.000 euros a colaborar co Concello na restauración de cinco inmobles dende que se puxo e marcha a liña de axudas para ese fin
- Compartir
-
-
-
Trabada (Lugo), 3 de decembro de 2025
A Consellería de Vivenda e Planificación de Infraestruturas apoiou con 43.000 euros a rehabilitación dun novo inmoble de titularidade municipal en Trabada para dedicar a alugueiro accesible.
O delegado territorial da Xunta en Lugo, Javier Arias, comprobou hoxe o resultado das obras de acondicionamento da vivenda, a antiga escola de Valboa, situada no lugar das Cabanas.
Arias explicou que dende que se puxo en marcha esta liña de axudas no ano 2017, o Goberno galego destinou 174.100 euros a colaborar co Concello de Trabada na recuperación de inmobles da súa propiedade situados nos núcleos da Igrexa (Sante); O Castro (Vidal); Vilapercide e Trabadela.
Estas actuacións, xunto coa executada este ano en Valboa, deron lugar a cinco vivendas repartidas por diferentes parroquias para poñer á disposición da cidadanía en réxime de alugamento.
O delegado lembrou que as axudas poden acadar o 95% do investimento realizado polas entidades locais. No conxunto da provincia, ao abeiro da convocatoria deste ano concedéronse un total de 561.000 euros a sete concellos para xerar 13 residencias.
Arias lembrou que ofrecer facilidades de acceso á vivenda é unha competencia de todas as administracións. Resaltou que a Xunta está volcada en ampliar o parque público residencial da provincia, con novas promocións en marcha e liñas de colaboración cos concellos.