Portal IGVS

Santiago de Compostela, 26 de novembro 2025

A Xunta recoñece as traxectorias profesionais de Jesús Irisarri, Guadalupe Piñera e Roberto Medín nos Premios de Arquitectura e Rehabilitación de Galicia 2025.

A conselleira de Vivenda e Planificación de Infraestruturas, María M. Allegue, presidiu hoxe a quinta edición destes galardóns. Á gala tamén asistiron o secretario xeral técnico da Consellería, Yago Borrajo; o secretario xeral de Vivenda e Urbanismo, Heriberto García Porto; a directora xeral de Urbanismo, Encarnación Rivas; ou o director da Axencia Galega da Industria Forestal (Xera), Alfredo Fernández Ríos.

Allegue agradeceu o traballo destes profesionais que “tanto levan aportado ao progreso de Galicia”. No caso de Jesús Irisarri e Guadalupe Piñera, puxo en valor a contribución “continuada, ética e exemplar á arquitectura galega contemporánea”.

Nesta categoría tamén se recoñeceu a Roberto Medín, por unha carreira tan prolífica e por ser “un exemplo de ética, compromiso e de humanidade”. Allegue indicou que “Medín é un referente da profesión durante 5 décadas e merece o maior dos recoñecementos”.

A conselleira enxalzou o labor dos arquitectos o seu “talento e excelencia que contribúe ao desenvolvemento da nosa terra e a reforzar a marca Galicia Calidade”.

Cualificou a arquitectura como “profesión versátil e innovadora, que sempre ofrece solucións ante as demandas da cidadanía”. Neste sentido, indicou que esa polivalencia tamén se reflicte nas distintas categorías dos galardóns outorgados.

En primeiro lugar, na categoría de Premio galego de Arquitectura, resultaron premiados un proxecto de mobilidade e un de vivenda.

Puxo en valor a obra do HALO en Vigo, impulsada por Alexandre Mouriño, José Carlos Núñez de Oliveira e Miguel Sacristán Montesinos. Trátase dunha actuación que “hoxe xa é toda unha icona na cidade”.

Os citados premios autonómicos tamén recoñeceron un edificio  de 34 vivendas no barrio compostelán de Santa Marta, cuxo proxecto corresponde aos arquitectos Manuel Carbajo e Celso Barrios. O xurado valorou o “aproveitamento de todos os recursos para acadar unha solución óptima,  en canto a distribución de espazos, iluminación e eficiencia enerxética”.

En segundo lugar, na categoría de Rehabilitación resultou premiada a restauración interior da casa consistorial de Pontevedra, cuxos autores foron María Gracia Amandi e Dionisio Jorge de Uña. Trátase dunha “intervención de calidade que realza a beleza do edificio e permite prestar un mellor servizo aos empregados municipais e á cidadanía”, segundo detallou María M. Allegue.

Na categoría de Sustentabilidade, o premio recaeu nas arquitectas Cristina Ezcurra e Cristina Ouzande pola reforma do centro de saúde do Porriño. A conselleira apuntou que grazas a esta actuación “a veciñanza conta agora cunhas instalacións máis amplas, con máis servizos e nun entorno máis moderno e humanizado”.

Cómpre lembrar que o xurado que seleccionou os premiados está conformado por expertos procedentes do IGVS, da Dirección Xeral de Patrimonio, da Real Academia Galega de Belas Artes, da Escola Técnica Superior de Arquitectura da Universidade da Coruña; da Escola Universitaria de Arquitectura Técnica da UDC, do Colexio Oficial de Arquitectos de Galicia; da Federación Galega da Construción; da Federación de Promotores de Edificación e Solo de Galicia e do Consello Galego de Arquitectura Técnica.

A conselleira destacou que “comprobar a excelencia da arquitectura en Galicia é unha  satisfacción para todos, máis aínda para a consellería que dirixo e cuxos eixes estratéxicos son a vivenda, o urbanismo e a ordenación do territorio, e as infraestruturas”.