Portal IGVS

Madrid, 26 de novembro de 2025

O presidente da Xunta, Alfonso Rueda, destacou hoxe a aposta do Executivo galego por poñer máis vivendas no mercado e axudar aos galegos e galegas a poder acceder a elas.

Durante a súa intervención no foro España 360, organizado en Madrid por Prensa Ibérica, o titular do Goberno galego reivindicou o labor das comunidades autónomas no mantemento do estado do benestar e dos servizos públicos que demanda a cidadanía, así como a defensa dunha España na que cada rexión ten “situacións específicas” e tamén “moitos puntos en común”. Por este motivo salientou que “o que fagamos desde cada territorio constrúe o conxunto” e por iso “é bo que se saiba o que facemos en cada lugar”.

Rueda destacou que facilitar o acceso á vivenda é unha “enorme preocupación” para os galegos e unha prioridade para o Executivo autonómico, que a está a afrontar con medidas concretas, como o incremento do parque público de vivenda, co obxectivo de duplicalo nesta lexislatura para pasar de 4.000 a 8.000. Con este obxectivo, subliñou que a Xunta ten xa en marcha 3.000 vivendas e o vindeiro ano comezará coas 1.000 restantes, ao tempo que “moitas promocións poderanse entregar aos seus futuros inquilinos”.

Así mesmo, o Executivo autonómico está a impulsar a mobilización de vivendas baleiras co programa Fogar Vivo; o desenvolvemento do solo con axilidade, acurtando prazos burocráticos, coa declaración de Proxectos de Interese Autonómico ou coa da Estratexia de Solo Residencial para poder aumentar a construción de vivendas –20.000 protexida e 5.000 libre–; ou as rebaixas de impostos e seguridade xurídica para a compra de vivenda para rehabilitación ou polo arrendamento das que se atopan baleiras.

No marco destas medidas, o presidente salientou que os mozos e mozas son os que máis están a sufrir o problema da vivenda, polo que apoialos con “medidas que os discriminen positivamente” é unha prioridade. Así, a Xunta ofrécelles facilidades para acceder a hipotecas ou rebaixas no imposto de Transmisións Patrimoniais, ademais de reservar o 40% das novas vivendas públicas en alugueiro e unha de cada catro das de venda para persoas menores de 36 anos.

Rueda subliñou que todas estas accións non serían posibles sen un importante respaldo orzamentario, posto que no período 2024-2026 a Xunta multiplicou por cinco o orzamento para a construción de vivenda de promoción pública e o vindeiro ano dedicará 350 millóns de euros a políticas de vivenda, das cales 163 serán para a construción de vivenda pública.

Novas medidas para dinamizar o mercado

O titular do Goberno galego destacou a importancia da colaboración público-privada para a construción de vivenda. A Xunta está a deseñar medidas que incentivan ao sector privado a construír vivenda protexida, como destinar solos dotacionais sen uso a vivenda, ampliar a edificabilidade de solo previsto na lei onde a maioría sexa para vivendas a prezos taxados e un novo fondo de cooperación de 10 millóns de euros para financiar sen intereses a construción de nova vivenda protexida.

Ademais, en 2026 o Goberno galego triplicará a contía das axudas para promotores de vivenda protexida ata chegar aos 15 millóns de euros, lanzará unha nova medida para axudar a rehabilitar vivendas en concellos de menos de 5.000 habitantes e porá en marcha un programa piloto para adquirir locais en desuso para destinalos a vivenda “con todas as condicións de habitabilidade”.

Falla de compromiso do Estado

Con todo, o presidente da Xunta lamentou que o Goberno central teña paralizados moitos aspectos que contribuirían a atallar o actual problema da vivenda. Así, destacou que a día de hoxe non estean oficializados os compromisos financeiros do novo Plan de Vivenda –cando está a piques de vencer o anterior e ao que Galicia afirmou “que estaba en condicións de adherirse”– ou non se teña blindado a continuidade de actuacións de vivenda en execución vencelladas a fondos europeos MRR –que teñen como horizonte de finalización o vindeiro mes de xuño–.

Nesta mesma liña, laiouse de que o Executivo estatal siga sen ceder ás comunidades autónomas as vivendas da Sareb para “convertelas en vivenda social” e integralas no parque público residencial, máis despois de que o Ministerio anunciase que sacará a concurso a xestión de 40.000 vivendas desta entidade. Do mesmo xeito, contrastou a inexistente execución da anunciada sociedade para promover vivenda a nivel estatal, co traballo de Vipugal no último ano promovendo “a metade dos 4.000 pisos” anunciados.