VolverA Xunta recibe oito ofertas para a redacción do proxecto de interese autonómico para desenvolver solo que permita a construción de case 1.800 vivendas en Vigo e Vilagarcía de Arousa
Trátase da contratación da redacción do PIA, do proxecto de expropiación e de parcelamento para a obtención de 20,1 hectáreas de solo en Vigo e Vilagarcía de Arousa, destinado maioritariamente á construción de vivendas protexidas
O lote 1 céntrase no ámbito que se desenvolverá en Vigo, que é o de Cantabria-Ramón Nieto-Santa Cristina, de 13,9 ha, onde se poderán construír 1.392 vivendas
O lote 2 atinxe a Vilagarcía, é o ámbito a desenvolver é o comprendido entre a avenida Carolinas e as rúas Coca e Arealonga, de 6,2 ha, onde se poderán construír 350 vivendas
Este contrato enmárcase na Estratexia Galega de Solo Residencial que ten en marcha a Xunta para desenvolver solo no que facilitar a construción de 25.000 vivendas en Galicia, 20.000 protexidas e 5.000 libres
- Compartir
-
-
-
Santiago de Compostela, 4 de xuño de 2025
A Xunta recibiu oito ofertas de empresas para executar o servizo de redacción do Proxecto de Interese Autonómico (PIA), para desenvolver solo que permita a construción de vivenda protexida en Vigo e en Vilagarcía de Arousa.
Baixo este contrato, licitado por un orzamento de 568.911 euros, tratase de desenvolver o PIA, o proxecto de expropiación e o de parcelamento, para a obtención de 20,1 hectáreas de solo nos concellos de Vigo e Vilagarcía de Arousa, destinado maioritariamente á construción de vivendas protexidas.
A Xunta licitou este contrato, que dividiu en dous lotes, estes dous ámbitos, elixidos en consenso cos respectivos concellos de Vigo e de Vilagarcía, cunha superficie total de 20,1 hectáreas, onde se estima poderán construírse un total de 1.742 vivendas.
En concreto, presentáronse catro ofertas ao lote 1, que atinxe ao municipio de Vigo, trátase do ámbito do SUB 403 comprendido entre as rúas Cantabria, Ramón Nieto e Santa Cristina, de un total de 13,9 hectáreas. Nesta contorna a previsión é de construír 1.392 vivendas.
Ao lote 2 concorreron outras catro empresas. Neste caso, este segundo lote céntrase no ámbito escollido en Vilagarcía, que é o comprendido entre a avenida das Carolinas e as rúas Coca e Arealonga, de 6,2 hectáreas, cunha estimación de 350 fogares.
Este contrato enmárcase na Estratexia Galega de Solo Residencial que ten en marcha a Xunta, co obxectivo de desenvolver solo no que facilitar a construción de 25.000 vivendas en Galicia, 20.000 protexidas e 5.000 libres. Xa está en marcha a primeira fase, coa contratación dos PIA para desenvolver sete ámbitos en Pontevedra, Vigo, Ourense, Lugo, Ourense, Arteixo e A Coruña, onde se prevé urbanizar solo no que construír as primeiras 15.000 vivendas.