VolverA titular de Vivenda e Planificación de Infraestruturas, María Martínez Allegue, interveu esta tarde no Parlamento
A conselleira Allegue pon en valor a colaboración da Xunta cos concellos para dar respostas efectivas ás necesidades de vivenda
Allegue subliñou que os municipios son actores fundamentais cos que a Xunta mantén aberto un amplo abano de posibilidades para incrementar a oferta de vivenda
Salientou a Plataforma de Solo, a disposición dos municipios para que poidan concursar parcelas da súa titularidade a través do IGVS e ofrecerllas a promotores e cooperativas
Destacou que os concellos tamén poden recorrer ao novo Fondo de cooperación, para financiar sen xuros a construción de nova vivenda protexida, urbanizar solo ou adquirilo
Remarcou que o vindeiro ano os concellos poderán promover e desenvolver os seus propios Proxectos de Interese Autonómico (PIA) para a creación de solo que se destinará, polo menos nun 80%, a construír vivenda protexida
Recordou que a Xunta incrementará nun 30% as axudas para que os concellos medianos e pequenos rehabiliten inmobles municipais en desuso e os dediquen a alugueiro social
- Compartir
-
-
-
Santiago de Compostela, 3 de decembro de 2025
A conselleira Allegue pon en valor a colaboración da Xunta cos concellos para dar respostas efectivas ás necesidades de vivenda. Así o sinalou esta tarde a conselleira de Vivenda e Planificación de Infraestruturas, María Martínez Allegue, no Parlamento de Galicia.
Allegue subliñou que os municipios son actores fundamentais cos que o Goberno galego mantén aberto un amplo abano de posibilidades para incrementar a oferta de vivenda.
Reiterou a disposición da Xunta a colaborar co Concello de Foz, obxecto da pregunta parlamentaria, e con todos os municipios galegos, pois o reto da vivenda debe implicar a todas as administracións.
Fixo fincapé en iniciativas da Xunta como a Plataforma de Solo, a disposición das entidades locais para que poidan concursar parcelas da súa titularidade a través do IGVS e ofrecerllas aos promotores e cooperativas. Concretou que xa se adheriron concellos como As Pontes, A Arnoia, Friol, Valdoviño, O Valadouro, Ordes ou A Peroxa.
Salientou que os concellos tamén poden recorrer ao novo Fondo de cooperación, que lles permite financiar sen xuros a construción de nova vivenda protexida, urbanizar solo ou adquirilo para futuros desenvolvementos residenciais.
Destacou as axudas da Xunta aos concellos para a rehabilitación de vivendas de titularidade municipal, puntualizando que entre 2017 e 2025 se concederon a 82 concellos para a recuperación de 285 inmobles.
Recordou, tal como xa anunciou hoxe o presidente da Xunta, que o Goberno galego incrementará nun 30% as axudas para que os concellos medianos e pequenos rehabiliten inmobles de carácter municipal que están en desuso e os dediquen a alugueiro social.
A conselleira tamén remarcou como novidade que o vindeiro ano os concellos poderán promover e desenvolver os seus propios Proxectos de Interese Autonómico (PIA) para a creación de solo que se destinará, polo menos nun 80%, a construír vivenda protexida.
Sareb
Ademais lembrou que a Xunta leva anos reclamando a cesión gratuíta de activos da Sareb para incrementar o parque de vivenda e criticou que o Goberno central anuncie que vai lanzar un contrato de 55M€ para privatizar e poñer en mans de inmobiliarias a xestión de todas esas vivendas e solos.
Lamentou que esta “privatización da xestión, o único que vai provocar é que os demandantes desas vivendas teñan que agardar aínda máis tempo a que se liciten e adxudiquen os contratos de xestión e se poña en marcha o sistema de alugueiros, no suposto de que se presenten empresas interesadas”.