Portal IGVS

Santiago de Compostela, 7 de maio de 2025

A conselleira de Vivenda e Planificación de Infraestruturas, María Martínez Allegue, salientou que a nova sociedade Vipugal iniciou desde a súa posta en marcha hai 4 meses os trámites para construír máis de 1.200 vivendas públicas.

María M. Allegue interveu hoxe no Parlamento, onde detallou que a Sociedade de Vivenda Pública de Galicia, Vipugal, está a progresar coa previsión de que todas estas vivendas estean contratadas e coas obras en marcha en 2026.

Indicou que esta sociedade, desde que iniciou a súa actividade en xaneiro, tense convertido nunha ferramenta clave na promoción de vivenda pública e na xestión de solo residencial.

Sinalou que este ente vai promover 2.350 vivendas públicas ata 2028 e conxuntamente co Instituto de Vivenda e Solo de Galicia, avanzará no obxectivo de chegar ás 4.000 novas vivendas e duplicar o actual parque de vivenda pública nesta lexislatura. 

Explicou que Vipugal está a facer especial fincapé na cesión de solo por parte dos concellos.  Detallou que está acordada a cesión de solares na Coruña,  Pontevedra, Lugo, Teo, Lalín e A Estrada para máis de 350 vivendas; e están avanzadas as xestións con outros municipios como Ames, Carballo, Narón, Santiago de Compostela, Vilagarcía de Arousa, San Cibrao das Viñas ou Bueu. En total, disporase de solo cedido con capacidade para máis de 850 vivendas máis.

Lamentou que a empresa pública de vivenda que tamén anunciara o Goberno central en decembro aínda non se puxera en marcha. A día de hoxe descoñécese todo sobre esta suposta entidade: a denominación oficial, estrutura, funcións, orzamento, recursos, cronograma.

Contrapuxo con esta liña de acción do Executivo a aposta sen precedentes da Xunta pola vivenda, coa creación da sociedade Vipugal, que está a e avanzar na súa programación con eficacia.