Portal IGVS

Pontevedra, 10 de novembro de 2025

A Xunta concedeu no que vai deste ano oito axudas a cooperativas e promotores para construción de vivenda protexida, cun investimento autonómico de 4,3M€. A conselleira de Vivenda e Planificación de Infraestruturas, María M. Allegue, visitou hoxe as obras dun inmoble que unha cooperativa constrúe en Pontevedra para 56 vivendas protexidas cunha destas achegas da Administración autonómica, por 560.000€.

En concreto, a cooperativa Andares do Lérez executa as obras deste inmoble na rúa Ernestina Otero, no ámbito de Tafisa, coa previsión de finalizalo no 2027. Esta é unha das 8 cooperativas e promotoras beneficiadas coas axudas autonómicas este ano en Galicia, cunha dotación total de 4,3M€ para a construción de 403 vivendas.

Seis cooperativas recibiron achegas na modalidade de vivenda protexida destinada á venda, cun investimento da Xunta de 3,8M€. É o caso do inmoble visitado hoxe e outro que tamén se construirá en Pontevedra, ademais de 4 achegas na Coruña, para un total de 381 vivendas. E outras 2 promotoras de Cervo e A Coruña recibiron achegas na modalidade destinada ao alugueiro, cun investimento autonómico de 574.643€, para a posta no mercado de 22 vivendas.

A conselleira destacou que a Xunta potenciará esta liña de axudas nos Orzamentos do 2026, e prevé triplicar ata preto de 15M€ o investimento para seguir a incentivar a construción de vivenda protexida. De novo haberá as dúas modalidades de achegas, para destinar as vivendas á venda e a alugueiro e os prezos das mesmas serán os da vivenda protexida para as modalidades de réxime especial, xeral e concertado. Achegas que tamén se suman ás que a Xunta ofrece a particulares para adquisición de vivenda.

Allegue volveu destacar a necesaria colaboración do sector público e privado para garantir o acceso á vivenda digna, de calidade e a un prezo accesible e insistiu na reclamación que a Xunta ten feito ao Goberno central para que incorpore esta liña de achegas a promotores para venda no Plan Estatal de Vivenda, que ata agora só contempla as de alugueiro.

Subliñou así mesmo as medidas que a Xunta porá en marcha o vindeiro ano para seguir impulsando e axilizando a posta a disposición de vivenda, como a modificación normativa para a construción de vivenda protexida en solos dotacionais en desuso, ou a posibilidade de incrementar a edificabilidade en solos urbanizables, se se garante que o 60% sexa vivenda protexida, así como a posibilidade de que os concellos poidan promover e desenvolver PIAS para a creación de solo destinado maioritariamente á construción de vivenda protexida.

Compromiso de vivenda en Pontevedra

A conselleira de Vivenda e Planificación de Infraestruturas puxo en valor o compromiso da Xunta para seguir a impulsar vivenda en Pontevedra e subliñou que no mesmo ámbito de Tafisa visitado hoxe, a Xunta vai construír 53 vivendas públicas nunha das parcelas cedidas polo Concello. Súmanse ás 236 vivendas públicas que xa están en marcha no barrio de Valdecorvos e 11 noutra parcela nas Devesas. Ademais, a Xunta está a tramitar o desenvolvemento do ámbito de San Mauro a través dun Proxecto de Interese Autonómico (PIA), coa previsión de 2.040 futuras vivendas.