Portal IGVS

Santiago de Compostela, 25 de maio de 2024

A Xunta investirá máis de 11 M€ na construción de 50 vivendas de promoción pública nos terreos localizados na parcela Z-38, no barrio de Xuxán, na cidade da Coruña. As vivendas serán destinadas ao alugueiro na súa totalidade.

A Consellería de Vivenda e Planificación de Infraestruturas, a través do Instituto Galego de Vivenda e Solo, vén de licitar estas obras co obxectivo de telas rematadas no ano 2026.

Trátase do terceiro grupo de vivendas de promoción pública cuxa construción se licita en Xuxán, onde a Xunta xa rematou e entregou aos adxudicatarios 40 vivendas. Ademais, tamén están xa adxudicadas as obras para executar outras 40 neste barrio da cidade, que se iniciarán en canto se dispoña da licencia municipal.

A nova promoción obxecto desta licitación emprazarase nunha parcela cunha superficie de 1.600 metros cadrados. O inmoble coas 50 vivendas disporá de tres plantas subterráneas, onde se sitúan os garaxes, rochos e espazos para as instalacións, e dunha planta baixa, onde se localizan os portais de acceso ás vivendas, locais comerciais e locais de instalacións comúns.

Nas cinco plantas altas haberá 50 vivendas. En total, o edificio terá 36 vivendas de 3 dormitorios (entre 87,25 e 90,60 metros cadrados útiles, das cales 2 estarán adaptadas para persoas con mobilidade reducida), 7 con 4 estancias (entre 112 e 114 metros cadrados útiles) e 7 con 2 dormitorios (entre 70,45 e 73,50 metros cadrados útiles).

A superficie das vivendas de 2 dormitorios oscila entre os 66 e os 68 metros cadrados de superficie útil, mentres que as de 3 dormitorios moveranse entre os 86 e os 93 metros cadrados e as de 4 dormitorios van de 115 a 118 metros cadrados útiles.

O ámbito no que se construirán estas vivendas, o barrio de Xuxán, está sendo urbanizado co financiamento da metade dos custes por parte da Xunta, que é propietaria do 50 % do solo, que se destina á construción de 1.100 vivendas protexidas.

Ademais, recentemente a Xunta remitiu ao Concello da Coruña os documentos para o inicio da tramitación da modificación do PXOM, co obxectivo de cambiar o uso de dúas parcelas de propiedade autonómica para destinalas á construción de arredor de 520 vivendas protexidas.