Portal IGVS

Pontevedra, 6 de novembro de 2025

A Xunta licita por 7,6M€ as obras de 48 novas vivendas públicas en Valdecorvos, en Pontevedra, e avanza no procedemento ambiental do PIA para desenvolver solo residencial en San Mauro.

A conselleira de Vivenda e Planificación de Infraestruturas, María Martínez Allegue, xunto co delegado territorial da Xunta en Pontevedra, Agustín Reguera, deu conta hoxe da licitación deste actuación, que xa recolle a Plataforma de Contratos Públicos de Galicia.  O prazo de presentación de ofertas rematará o vindeiro 22 de decembro.

Este novo edificio no barrio de Valdecorvos constará de 6 plantas, garaxe  e varios locais comerciais.

Allegue avanzou que a Xunta tamén adxudicará antes de que remate este ano as obras para outro bloque de 56 novas vivendas.

Neste sentido, destacou que no vindeiro ano comezarán as obras destes novos edificios, ao tempo que se prevén entregar as 74 vivendas públicas, cuxos traballos avanzan a bo ritmo.

Puxo en valor a aposta da Xunta por este barrio, que contará con 236 novas vivendas, ás que se suman as 53 en Tafisa e as 11 das Devesas.

Remarcou que en conxunto a Xunta ten comprometido xa un investimento de 60M€ destinado á construción de novas vivendas públicas en Pontevedra e concretou que un total de 28,19M€ están consignados para 2026.

Ademais a conselleira lembrou que o Goberno galego está avanzando na Estratexia de desenvolvemento de solo, que en Pontevedra suporá a construción doutras 2.000 vivendas máis, por parte de promotores e cooperativistas.

A este respecto, puntualizou que a Xunta vén de remitir á Dirección Xeral de Calidade Ambiental o proxecto para iniciar o procedemento ambiental que permita continuar coa tramitación administrativa do PIA do ámbito de San Mauro no que se desenvolverá solo residencial.

Novas medidas

Por outra parte, María M. Allegue sinalou que o Executivo autonómico activará o vindeiro 1 de xaneiro novas medidas que posibilitarán sumar máis vivendas. 

Apuntou que “ogallá o vindeiro ano se poidan ver máis proxectos de nova vivenda nos solos dotacionais que hoxe están en estado de abandono ou desuso,  o que permitirá incrementar a oferta de aloxamentos e revitalizar zonas degradadas na cidade”.

Salientou que se incrementará a edificabilidade nun 20% sempre que a promoción adique alomenos o 60% a vivenda protexida.

Remarcou que os concellos tamén poderán promover e desenvolver Proxectos de Interese Autonómico para a creación de solo destinado ao menos nun 80% á construción de vivenda protexida.

Subliñou ademais que os Orzamentos da Xunta para 2026 incrementan a dotación das axudas a promotores e cooperativistas, triplicando a contía ao pasar de 5M€ a preto de 15M€.