A Xunta licita as obras para construír 56 vivendas en Pontevedra, cun investimento de 9,3 M€
Trátase da primeira obra licitada pola Sociedade Pública de Vivenda de Galicia (VIPUGAL)
O prazo para presentar ofertas rematará o vindeiro 9 de setembro
O inmoble contará con tres bloques independentes de catro plantas de altura na parcela P-14 do Polígono B1 de Valdecorvos
Pontevedra, 17 de xullo de 2025
A conselleira de Vivenda e Planificación de Infraestruturas, María Martínez Allegue, xunto ao delegado territorial da Xunta en Pontevedra, Agustín Reguera, visitou hoxe a parcela P-14 de Valdecorvos, en Pontevedra, co galo da publicación da licitación das obras para a construción de 56 vivendas por parte da Sociedade Pública de Vivenda de Galicia (VIPUGAL). O prazo para presentar ofertas rematará o vindeiro 9 de setembro. A Xunta fai un investimento nesta actuación de 9,3M€.
O inmoble para estas 56 vpp distribuirase en tres bloques independentes de catro plantas de altura e baixo cuberta, ademais de garaxes, rochos e locais. As obras terán un prazo de execución de 18 meses.
M. Allegue destacou que VIPUGAL traballa “ao máximo rendemento” para atallar o problema do acceso á vivenda e puxo en valor que a obra de Valdecorvos é a primeira que licita a Sociedade Pública de Vivenda de Galicia.
A conselleira lamentou a falta de compromiso do Goberno Central e do Ministerio de Vivenda, “que promete milleiros de vivendas e nin tan sequera ten licitada a primeira, duns supostos préstamos ICO que en Galicia non accedemos... E desa suposta Sociedade Estatal da que non temos información da súa actividade”. Engadiu que “para o Goberno galego o acceso á vivenda é máxima prioridade e debería selo tamén para o resto das administracións”.
En Valdecorvos, a Xunta ten en marcha na actualidade 236 vivendas de promoción pública. Delas, 74 están en construción e xa se celebrou o sorteo para a súa adxudicación provisional, ás que hai que sumar estas 56 cuxas obras se autorizan hoxe e outras 48 cuxa construción licitarase tamén proximamente na P17.
Así mesmo, está adxudicada a redacción dos proxectos para converter 4 baixos en vivendas, ao que se suma a licitación da redacción do proxecto para 54 vivendas na parcela P19.
A maiores, a Xunta ten licitada a redacción do proxecto para a construción doutras 53 vivendas públicas na parcela de Tafisa cedida polo Concello, así como tamén a redacción do proxecto para outras 11 vivendas na parcela das Devesas, igualmente cedida pola Administración local.