A Xunta inicia as obras dun novo inmoble para 41 vivendas en Navia, Vigo
Con este novo edificio que se comeza a construír, o Goberno galego xa ten 5 en obras no Polígono 1 de Navia
Allegue explicou que a Xunta xa ten en marcha un milleiro de vivendas na cidade olívica, e máis de 2.000 en toda Galicia
A titular de Vivenda e Infraestruturas deu conta tamén da publicación da licitación do proxecto e dirección de obra, no Perfil do contratante, doutro inmoble máis para 26 fogares no Polígono 2
Allegue destacou que estas actuacións son “a resposta do Goberno galego” ás demandas da cidadanía na cidade e puxo en valor que Vigo “é unha prioridade para o Goberno Rueda”
Vigo, 22 de abril de 2025
A conselleira de Vivenda e Planificación de Infraestruturas, María M. Allegue, xunto coa delegada territorial da Xunta en Vigo, Ana Ortiz, anunciou hoxe o inicio das obras dun novo inmoble no barrio vigués de Navia, para 41 vivendas protexidas. O investimento ascende a máis de 8,3M€, dos que un 24,4% son fondos europeos. O edificio atópase no Polígono 1, e disporá de 20 vivendas de 2 dormitorios, 20 de 3 e 1 de 4 estancias.
A conselleira tamén deu conta da publicación hoxe da licitación do proxecto e dirección de obra, no Perfil do contratante, doutro inmoble máis, para 26 fogares, no Polígono 2 do barrio vigués.
Allegue destacou que Vigo “é unha prioridade para o Goberno Rueda, unha cidade onde a Xunta xa ten nalgún grao de execución un milleiro de vivendas protexidas” e salientou que “así é como responde o Goberno galego ás demandas da veciñanza da cidade olívica”.
Por outra banda, a titular de Vivenda e Planificación de Infraestruturas puxo en valor os Proxectos de Interese Autonómico para habilitar solo no ámbito Ofimático para 2.300 vivendas e na zona de Ramón Nieto para 1.400, no marco da Estratexia Galego do Solo Residencial.