A Xunta destaca as vantaxes das entidades de certificación de conformidade municipal para axilizar as licenzas urbanísticas e facilitar o acceso á vivenda
Allegue fai fincapé na axilización, simplificación e redución dos tempos, tanto para os particulares que soliciten os servizos das ECCOM, como para os concellos
Destaca o avance en materia de vivenda e urbanismo neste primeiro ano e medio, así como o importante papel da cooperación entre administracións e sector privado na aceleración dos proxectos e a consecución dos obxectivos
Subliña o avanzado polo departamento que dirixe neste ano e medio de lexislatura cara a desenvolver o plan que permitirá acadar 4.000 novas vivendas protexidas no ano 2028, das que 3.000 xa están en marcha, prevéndose as primeiras entregas para o vindeiro 2026
A Coruña, 15 de outubro de 2025
A Xunta destaca as vantaxes das Entidades de certificación de conformidade municipal (ECCOM) para axilizar as licenzas urbanísticas e facilitar o acceso á vivenda en Galicia.
A conselleira de Vivenda e Planificación de Infraestruturas, María M. Allegue, clausurou hoxe a xornada organizada pola Asociación Provincial de Promotores Inmobiliarios da Coruña Aproinco: ECCOM: ¿Hacia un nuevo urbanismo?, salientou hoxe que garantir o acceso a unha vivenda digna e accesible é unha prioridade absoluta do Goberno galego, que está a actuar con medidas concretas para dar resposta á demanda crecente, especialmente entre a mocidade.
A conselleira subliñou que un dos principais retos do sector é axilizar os tempos e reducir a burocracia, mantendo sempre a seguridade xurídica. Neste sentido, destacou a posta en marcha das Entidades de Certificación de Conformidade Municipal (ECCOM), plenamente operativas dende o 17 de agosto.
Estas entidades, explicou, teñen a mesma validez ca os informes técnicos e xurídicos municipais, e permitirán reducir de forma significativa os prazos de concesión de licenzas urbanísticas, unha demanda histórica de cidadáns, concellos e profesionais do sector.
A responsable autonómica agradeceu a colaboración da Fegamp, dos colexios profesionais e do propio sector da construción, que participaron activamente no proceso de elaboración do decreto regulador.
O obxectivo paga a pena: “axilizamos, simplificamos e reducimos tempos, garantindo a seguridade xurídica, tanto dos particulares que soliciten os servizos das ECCOM, como dos concellos”, afirmou.
Durante a súa intervención, a conselleira fixo balance do ano e medio de lexislatura e lembrou que desde o departamento que dirixe se está a desenvolver o plan que permitirá acadar 4.000 novas vivendas protexidas no ano 2028, das que 3.000 xa están en marcha, das cales preto de 900 xa o están, e as primeiras entregas previstas para 2026.
A titular do departamento destacou tamén que sen solo non hai vivenda, polo que a Xunta aprobou a Estratexia de Desenvolvemento de Solo Residencial, que permitirá poñer á disposición do mercado o necesario para construír 25.000 novas vivendas, o 80 % delas protexidas.
A este esforzo engádense axudas para promotores e cooperativas, dar seguridade xurídica, así como novas medidas de incentivo, entre elas o programa Fogar Vivo, que busca incentivar a posta no mercado de vivendas baleiras mediante axudas para reparacións, compra de electrodomésticos ou seguros de impago e multirrisco.
Tamén se están a implementar medidas transversais, como o remate de esqueletos estruturais ou a habilitación de baixos comerciais en vivendas, para ampliar a oferta dispoñible.
A conselleira rematou sinalando que o reto do acceso á vivenda é compartido e require a implicación de todas as administracións. “Temos que arrimar o ombreiro -dixo- pero non só debe construír a Xunta, os concellos tamén deben comprometerse; e temos que axudar ao sector e en consecuencia axudar ao cidadán co acceso a unha vivenda digna e accesible”.