A Xunta amplía en máis de 4 M€ os fondos destinados ao bono de alugueiro social
O Diario Oficial de Galicia publica hoxe a resolución deste incremento do orzamento para este ano e o vindeiro 2025, no obxectivo de garantir unha axuda para o pago do alugueiro ás persoas incluídas nalgún dos colectivos beneficiarios do Bono
Santiago de Compostela, 17 de outubro de 2024
A Xunta amplía en 4.287.709 euros os fondos destinados ás axudas do Bono de alugueiro social, destinado a facilitar o pago do alugueiro por parte das persoas comprendidas nalgún dos colectivos beneficiarios desta axuda, como son vítimas de violencia de xénero, afectados por desafiuzamentos, persoas privadas da súa vivenda por circunstancias imprevisibles e sobrevidas, tales como incendios e inundacións, e outras persoas vulnerables con especiais dificultades para o acceso á vivenda.
Con esta ampliación de crédito, a Xunta destina ao Bono de alugueiro social un orzamento total que rolda os 7 M€.
Así, a Xunta publica hoxe no Diario Oficial de Galicia (DOG) a resolución do incremento do orzamento destas axudas para este ano e o vindeiro 2025, e coas que a Xunta ten como obxectivo ofrecer a posibilidade de garantir o pago do alugueiro da vivenda por parte dos beneficiarios da mesma.
Cómpre destacar que estas subvencións, cuxa convocatoria é continuada e permanente ata o esgotamento do crédito, garanten o financiamento do 100% do custe do alugueiro, sempre dentro dos límites establecidos.
A ampliación do crédito deste programa de axuda non implica a modificación do prazo para presentar solicitudes nin o inicio dun novo cómputo do prazo máximo para resolver.