Un total de 35 concellos solicitan en tan só 4 horas as axudas da Xunta para rehabilitar edificios de titularidade municipal con destino a 64 vivendas protexidas
O Goberno galego destina un orzamento bianual de 2,1M€ a esta nova convocatoria e os concellos poden solicitar as axudas desde hoxe ata o 3 de xullo ou ata esgotamento do crédito orzamentario
Como novidade, a contía das achegas desta liña, dirixida aos concellos de menos de 30.000 habitantes, increméntase nun 30% e o importe máximo pode acadar 65.000€, e 68.000€ no caso de que vivenda se atope en área Rexurbe, nas ARI dos Camiños de Santiago e Ribeira Sacra ou nun centro histórico declarado
As vivendas resultantes, destinadas a alugueiro accesible, terán cualificación pública permanente
Santiago de Compostela, 23 de xaneiro de 2025
Un total de 35 concellos solicitan en tan só 4 horas as axudas da Xunta para rehabilitación de edificios de titularidade municipal con destino 64 vivendas protexidas de promoción pública en alugueiro accesible. A Administración autonómica abriu hoxe o prazo de presentación de peticións para esta liña, que ten un orzamento bianual de 2,1M€ de fondos autonómicos e está destinada aos concellos de menos de 30.000 habitantes. Este prazo está aberto ata o 3 de xullo ou ata esgotamento do crédito orzamentario.
De xeito máis concreto, ás 13 horas, na provincia de Ourense rexistráronse peticións de 17 concellos, mentres que en Lugo foron 9 os que presentaron peticións, na Coruña 6 concellos e en Pontevedra, 3.
Nesta nova convocatoria a contía das axudas increméntase nun 30%, de xeito que o importe máximo que se concederá para cada vivenda pasa dos 50.000€ aos 65.000€. O importe da axuda poderá acadar o 95% do custe da rehabilitación, sen superar a contía máxima.
Ademais, no caso de que vivenda se atope en área Rexurbe, nas Áreas de Rehabilitación Integral (ARI) dos Camiños de Santiago e Ribeira Sacra ou nun centro histórico declarado, o máximo acada os 68.000€.
Ademais, como novidade, as vivendas resultantes, que se destinarán a alugueiro accesible, terán cualificación pública permanente. As achegas enmárcase no compromiso da Xunta para seguir poñendo a disposición vivenda a través, entre outras medidas, dos programas de rehabilitación.
De acordo ás bases da convocatoria, a través desta liña consideránse subvencionables a execución de obras de rehabilitación e/ou ampliación de edificacións e vivendas de titularidade municipal, así como as dirixidas ao cambio de uso de edificacións para o seu destino a vivenda.
Nas actuacións de rehabilitación, enténdense incluídas as de accesibilidade, conservación, habitabilidade, sustentabilidade e eficiencia enerxética das vivendas, así como as actuacións para a medición e a execución de obras que eviten a entrada do gas radon ou a adopción de medidas que garantan a súa eliminación do interior das vivendas.