Lugo. 70 vivendas de promoción pública

A parcela na cal se empraza a edificación proxectada ten unha superficie de 1.312 m2, forma rectangular e unhas dimensións aproximadas de 72,90x18,00m. Linda ao noroeste coa rúa E, ao sudeste coas zonas verdes libres 12.i e 12.g, ao suroeste coa rúa B e ao nordeste cunha parcela sen edificar. O terreo ten pendente en ambas direccións, duns 0,80 m na dirección transversal e duns 5 m na dirección lonxitudinal, o que obriga a dividir o edificio en dous volumes unidos pero con accesos a distinto nivel.

O edificio proxectado consta de dúas plantas de soto para garaxes, rochos e locais de instalacións; planta baixa dedicada a 2 portais de acceso, locais de instalacións, un local de reserva para o almacén de contedores do lixo, rochos, un local comunitario e a 6 vivendas; plantas 1 a 8 para uso de vivenda, con 8 vivendas por planta; e planta ático para rochos e locais instalacións. Hai 2 portais de acceso e cada un deles da servizo a 35 vivendas.

A edificación ocupa toda a superficie de parcela nas plantas baixo rasante e sobre rasante reduce a súa ocupación orixinando as terrazas das vivendas situadas en planta baixa.