Portal IGVS

A Comunidade Autónoma de Galicia ten en marcha varios programas dirixidos ao acceso á vivenda para os colectivos con maiores necesidades, todos eles recollidos no Pacto de Vivenda de Galicia 2021-2025, asinado polos representantes das entidades integrantes do pleno do Observatorio da vivenda de Galicia, documento que xorde da análise conxunta e da contribución de todos os representados no pleno do citado observatorio. No devandito pacto recóllense as liñas de actuación pública na materia, constituíndo un instrumento de planificación das políticas públicas neste eido para o período 2021-2025 na Comunidade Autónoma de Galicia.

Neste sentido, para evitar a dispersión das axudas, faise preciso incluír nunhas únicas bases reguladoras tanto as axudas autonómicas como as do programa de axuda ao alugueiro de vivenda regulado no Real decreto 42/2022, do 18 de xaneiro, polo que se regula bono alugueiro á mocidade e o Plan Estatal para o acceso á vivenda 2022-2025, modificado polo Real decreto 903/2022, do 25 de outubro.

De acordo con este marco normativo, esta resolución establece as bases reguladoras do Programa de axudas ao alugamento de vivenda na Comunidade Autónoma de Galicia e procede á súa convocatoria para o ano 2024, con carácter plurianual, coa finalidade de seguir afondando nas axudas ao alugamento de vivenda, a través de mecanismos que posibiliten que estas cheguen ao maior número de persoas posibles, e de forma proporcional aos seus ingresos, prestando especial atención aos colectivos con maior dificultade de acceso á vivenda.

Obxecto e réxime de concesión da axuda

Esta resolución ten por obxecto aprobar as bases reguladoras que rexerán a concesión inicial (código de procedemento VI483C) e a renovación (código de procedemento VI483D) das subvencións do Programa de axudas ao alugamento de vivenda na Comunidade Autónoma de Galicia, para facilitar o goce dunha vivenda en réxime de alugamento a sectores de poboación con escasos medios económicos, mediante o outorgamento de axudas directas ás persoas arrendatarias.

 Así mesmo, por medio desta resolución convócanse estas axudas para a anualidade 2024, con carácter plurianual.

A concesión das axudas recollidas nesta resolución tramitarase polo procedemento de concorrencia non competitiva, ata esgotar o crédito dispoñible previsto na correspondente convocatoria, de acordo co sinalado no artigo 19.2 da Lei 9/2007, do 13 de xuño, de subvencións de Galicia.

Procedemento de concesión da axuda

O procedemento iniciarase de oficio, en réxime de concorrencia non competitiva, mediante a publicación da correspondente convocatoria.

O prazo de presentación de solicitudes será o establecido na correspondente convocatoria.

As solicitudes tramitaranse en función da súa orde cronolóxica de entrada no rexistro electrónico da Xunta de Galicia. Para tal fin, considerarase data de presentación aquela en que a solicitude estea validamente cuberta e acompañada da totalidade dos documentos esixidos nas bases reguladoras e na correspondente convocatoria.

Unha vez completado o expediente e feitas as comprobacións oportunas, a persoa titular da xefatura da correspondente área provincial do IGVS elevará a proposta de resolución de concesión inicial ou de renovación de cada expediente á persoa titular da Dirección Xeral do IGVS quen, á vista delas e tendo en conta o límite orzamentario establecido en cada convocatoria, resolverá o que segundo en dereito proceda.

Requisitos para a obtención da axuda

1. Poderán ser beneficiarias das axudas contempladas neste programa as persoas físicas maiores de idade que reúnan todos e cada un dos requisitos seguintes:
   1. Posuír a nacionalidade española ou a dalgún dos Estados membros da Unión Europea ou do Espazo Económico Europeo, Suíza, ou o parentesco determinado pola normativa que lle sexa de aplicación. No caso de estranxeiros non comunitarios, deberán contar con autorización de estancia ou residencia en España.
   2. Ser titular, en calidade de persoa arrendataria, dun contrato de alugamento de vivenda, formalizado nos termos da Lei 29/1994, do 24 de novembro, de arrendamentos urbanos. Os contratos deberán ter unha duración mínima dun ano e facer mención expresa á referencia catastral da vivenda arrendada.
   3. Ter a súa residencia habitual e permanente na vivenda arrendada, o que se deberá acreditar mediante certificado ou volante de empadroamento, no que conste, á data da solicitude, as persoas que teñen o seu domicilio habitual na vivenda obxecto do contrato de alugamento.
   4. Que os ingresos mínimos da súa unidade de convivencia non sexan inferiores a 0,5 veces o IPREM.
   5. Atoparse ao día nas súas obrigas tributarias estatais e autonómicas e coa Seguridade Social e non ter pendente ningunha outra débeda, por ningún outro concepto, coa Administración pública da Comunidade Autónoma.
2. Ademais dos anteriores requisitos, deberán cumprirse os seguintes:
   1. Que a renda mensual da vivenda non supere os importes establecidos no ordinal oitavo destas bases reguladoras.
   2. Que a suma total das rendas anuais das persoas que formen parte da súa unidade de convivencia, consten ou non como titulares do contrato de alugamento, sexan iguais ou inferiores a 3 veces o IPREM. O límite será de 4 veces o IPREM no caso de que a unidade de convivencia sexa unha familia numerosa de categoría xeral ou dentro dela haxa persoas con discapacidade ou vítimas de terrorismo. O límite será de 5 veces o IPREM cando a unidade de convivencia sexa familia numerosa de categoría especial ou teña persoas con discapacidade cun grado recoñecido igual ou superior ao 33%.
   3. Non se poderá conceder a axuda cando a persoa solicitante ou algunha das integrantes da súa unidade de convivencia na vivenda obxecto do contrato de alugamento se atope nalgunha das situacións que a continuación se indican:
      1. Ser persoa propietaria ou usufrutuaria dalgunha vivenda en España. Para estes efectos, non se considerará que se é persoa propietaria ou usufrutuaria dunha vivenda se o dereito recae unicamente sobre unha parte alícuota desta e se obtivera por herdanza ou transmisión mortis causa sen testamento. Exceptuaranse deste requisito quen, sendo titular dunha vivenda, acredite a non dispoñibilidade dela por causa de separación ou divorcio, por calquera outra causa allea á súa vontade ou cando a vivenda resulte inaccesible por razón de discapacidade da persoa titular ou algunha outra persoa da unidade de convivencia.
      2. Ter parentesco en primeiro ou segundo grao de consanguinidade ou de afinidade coa persoa arrendadora.
      3. Ser socia ou partícipe da persoa física ou xurídica que actúe como arrendadora.
      4. Ser arrendataria dunha vivenda xestionada polo IGVS ou por calquera outra Administración pública.
      5. Estar incursa nalgunha das circunstancias previstas no artigo 13.2 da Lei 38/2003, do 17 de decembro e no artigo 10.2 da Lei 9/2007, do 13 de xuño.
   4. Tampouco poderán obter a condición de beneficiarias as persoas ás que se lles revogara algunha das axudas previstas neste ou no anterior plan de vivenda por incumprimento ou causa imputable á persoa solicitante ou a algunha das persoas integrantes da súa unidade de convivencia.

Solicitudes

As solicitudes realizaranse mediante a presentación do formulario de solicitude de concesión inicial (código de procedemento VI483C) ou de renovación da axuda (código de procedemento VI483D) que se incorporan a esta resolución como anexo I e anexo III, respectivamente, debidamente cuberto, que deberá dirixirse á Área provincial do IGVS onde estea situada a vivenda obxecto do contrato.

As solicitudes presentaranse preferiblemente por vía electrónica a través do formulario normalizado dispoñible na sede electrónica da Xunta de Galicia (https://sede.xunta.gal).

Opcionalmente, poderanse presentar as solicitudes presencialmente en calquera dos lugares e rexistros establecidos na normativa reguladora do procedemento administrativo común.

Documentación que se debe presentar coa solicitude

As persoas interesadas deberán achegar coa solicitude de concesión inicial da axuda, anexo I, (código de procedemento VI483C) a seguinte documentación:

1. Documentación acreditativa da representación da persoa que actúe no nome da persoa solicitante, de ser o caso. A representación deberá acreditarse a través do modelo normalizado dispoñible na sede electrónica da Xunta de Galicia ou por calquera outro medio válido en dereito. O modelo normalizado pódese descargar na seguinte ligazón: https://sede.xunta.gal/modelos-normalizados.
2. Contrato de alugamento de vivenda, formalizado nos termos da Lei 29/1994, do 24 de novembro. O contrato que se presente deberá ter unha duración mínima dun ano e facer mención expresa á referencia catastral da vivenda arrendada.
3. Anexo II, de declaración responsable das persoas integrantes da unidade de convivencia, distintas da persoa solicitante, no momento de presentación da solicitude, e de comprobación dos datos necesarios para a tramitación do procedemento.
4. Xustificante de empadroamento conxunto de todas as persoas integrantes da súa unidade de convivencia. As persoas integrantes da unidade de convivencia deben constar empadroadas na vivenda obxecto do contrato de alugamento na data da presentación da solicitude. Para estes efectos, recoñeceranse os certificados expedidos nos tres meses anteriores á data de presentación da solicitude. As persoas que figuren no xustificante de empadroamento conxunto deberán constar no anexo II.
5. No suposto de persoas emigrantes galegas retornadas a España deberá achegarse a seguinte documentación:
   1. Documentación acreditativa da vinculación con Galicia da persoa solicitante: nacemento en Galicia ou, de ser o caso, ser cónxuxe ou parella de feito inscrita ou descendente por consanguinidade dunha persoa galega e nacida en Galicia.
   2. Baixa consular, certificado de persoa emigrante retornada expedido polas delegacións ou subdelegacións do Goberno ou calquera outra documentación que acredite de xeito fidedigno a data de retorno a España, así como o tempo de residencia no estranxeiro durante un mínimo de dous anos inmediatamente anteriores á data do seu retorno a España.
6. No caso de non presentar declaración do IRPF ou no suposto de percibir algunha das rendas exentas previstas no artigo 7 da Lei 35/2006, do 28 de novembro, deberá achegarse a seguinte documentación:
   1. Certificado de retribucións e retencións da empresa ou empresas nas cales estivese de alta no exercicio económico previsto na correspondente convocatoria, de ser o caso.
   2. Certificado de pensións ou prestacións periódicas, emitido polo correspondente organismo oficial, no caso de non ser outorgadas polo Instituto Nacional da Seguridade Social (en diante, INSS) relativo ao exercicio económico previsto na correspondente convocatoria, de ser o caso.
   3. Certificados bancarios de rendementos de capital mobiliario, de ser o caso.
   4. Certificado da contía percibida pola renda de integración social de Galicia, de ser o caso.
7. No suposto de ingresos obtidos no estranxeiro, copia da declaración similar á do IRPF, autenticada pola correspondente delegación consular e, de ser o caso, certificado acreditativo de equivalencia en euros do importe declarado.
8. No caso de que algunha das persoas integrantes da súa unidade de convivencia sexan propietarias ou usufrutuarias dalgunha vivenda en territorio español e non poidan dispoñer dela:
   1. Convenio regulador de separación ou divorcio ou sentenza que acredite dita circunstancia, de ser o caso.
   2. Documentación que acredite que a persoa solicitante ou algunha das persoas integrantes da súa unidade de convivencia non poden habitar a vivenda por calquera outra causa allea á súa vontade, de ser o caso.
   3. Informe técnico que xustifique a inaccesibilidade da vivenda por razón da discapacidade da persoa solicitante ou dalgunha das persoas integrantes da súa unidade de convivencia, de ser o caso.
9. No caso de que a persoa solicitante ou algunha das persoas integrantes da súa unidade de convivencia sexan propietarias ou usufrutuarias da parte alícuota dunha vivenda en territorio español, documentación acreditativa de que foi obtida por transmisión mortis causa.
10. Extracto ou certificado bancario acreditativo do pagamento da renda das mensualidades correspondentes, no suposto de que o recoñecemento do dereito da axuda teña carácter retroactivo.
11. No caso de familias numerosas, título de familia numerosa, no suposto de tratarse dun documento non expedido pola Xunta de Galicia.
12. Certificado de discapacidade, con indicación do seu grao, da persoa solicitante e/ou das persoas que integran a súa unidade de convivencia, de ser o caso e para o suposto de tratarse dun documento non expedido pola Xunta de Galicia.
13. Acreditación da condición de vítima de terrorismo, de ser o caso.

Contía e duración das axudas

1. Concederase ás persoas beneficiarias unha axuda de ata o 50% da renda que deban satisfacer polo alugueiro da súa vivenda habitual e permanente, en función dos seus ingresos, conforme aos seguintes tramos:
   1. Ingresos dende 0,5 ata 1,5 veces o IPREM, o 50% da renda que deban satisfacer polo alugueiro.
   2. Ingresos superiores a 1,5 e ata 2,5 veces o IPREM, o 40% da renda que deban satisfacer polo alugueiro.
   3. Ingresos superiores a 2,5 e ata 3, 4 ou 5 veces o IPREM (en función dos límites máximos de ingresos previstos na letra b) do punto dous do ordinal sexto desta resolución), o 30% da renda que deban satisfacer polo alugueiro.
2. Con cargo a fondos autonómicos poderán incrementarse as porcentaxes anteriores de axuda en 10 puntos porcentuais para os seguintes colectivos:
   1. Persoas menores de 36 anos. No caso de subscrición do contrato por varias persoas, todas deberán cumprir este requisito de idade.
   2. Familias numerosas.
   3. Familias monoparentais.
   4. Unidades de convivencia inscritas no Rexistro Único de Demandantes de Vivenda da Comunidade Autónoma de Galicia cunha antigüidade superior a un ano.
   5. Persoas emigrantes galegas retornadas a España durante o ano inmediatamente anterior á data de publicación da correspondente convocatoria da axuda, sempre que teñan residido no estranxeiro un mínimo de dous anos inmediatamente anteriores á data do retorno a España.
3. A contía da axuda recoñecida na resolución de concesión determinarase en función da renda establecida no contrato, sen que en ningún caso o seu importe poida ser incrementado, aínda que a citada renda aumente ao longo da duración do contrato.
4. Se na renda do contrato se incluísen os gastos de comunidade e os seus custos non estivesen desagregados, figurando no contrato unicamente o importe global, para os efectos da determinación da subvención valorarase o importe dos gastos de comunidade como un 5% do importe total da renda e descontarase do seu total para aplicarlle a porcentaxe de subvención do 50%, 40% ou 30%, segundo lle corresponda.

   Así mesmo, se no contrato se incluísen anexos, como garaxes ou rochos, e o prezo de cada un deles non estivese desagregado, figurando no contrato unicamente o importe global, para os efectos da determinación da subvención, valorarase o importe da vivenda como un 80% do total da renda, cando esta inclúa vivenda e garaxe, 95% cando se inclúa vivenda e rocho, e 75% cando se inclúa vivenda, garaxe e rocho.

5. A axuda concederase anualmente e poderá acadar o prazo máximo de dous anos. Non obstante, para poder gozar da segunda anualidade deberá solicitarse a renovación anual no prazo que se sinale na resolución de concesión da axuda inicial. Para estes efectos, deberase achegar a documentación especificada no ordinal décimo cuarto.
6. O recoñecemento do dereito da axuda poderá ter carácter retroactivo, se así se acorda na correspondente convocatoria.

RENOVACIÓN DA SUBVENCIÓN

1. Todas as persoas que resulten beneficiarias e non perdesen o dereito mediante a oportuna resolución poderán renovala por outra anualidade, ata acadar unha duración máxima de dous anos, sempre que no momento da renovación da axuda a persoa beneficiaria cumpra os requisitos comúns previstos no ordinal sexto.
2. Para solicitar a renovación da axuda as persoas interesadas deberán achegar, nos termos establecidos nos ordinais décimo e décimo segundo, no prazo que se sinale na correspondente resolución de concesión inicial da axuda, o anexo III, de solicitude de renovación da axuda (código de procedemento VI483D), acompañado da seguinte documentación complementaria:
   1. Documentación acreditativa da representación da persoa que actúe no nome da persoa solicitante, de ser o caso. A representación deberá acreditarse a través do modelo normalizado dispoñible na sede electrónica da Xunta de Galicia ou por calquera outro medio válido en dereito. O modelo normalizado pódese descargar na seguinte ligazón: https://sede.xunta.gal/modelos-normalizados.
   2. Anexo II, de declaración responsable das persoas integrantes da unidade de convivencia, distintas da persoa solicitante, no momento de presentación da solicitude, e de comprobación dos datos necesarios para a tramitación do procedemento.
   3. Xustificante de empadroamento conxunto de todas as persoas integrantes da unidade de convivencia. As persoas integrantes da unidade de convivencia deben constar empadroadas na vivenda obxecto do contrato de alugamento na data da presentación da solicitude de renovación. Para estes efectos, recoñeceranse os certificados expedidos nos tres meses anteriores á data de presentación da solicitude. As persoas que figuren no xustificante de empadroamento conxunto deberan constar no anexo II.
   4. Declaración da persoa arrendadora da vivenda de que a persoa arrendataria non ten ningunha reclamación pendente por falta de pagamento das rendas e/ou das subministracións.
   5. No caso de non presentar declaración do IRPF ou no suposto de percibir algunha das rendas exentas previstas no artigo 7 da Lei 35/2006, do 28 de novembro, deberá achegarse a seguinte documentación:
      1. Certificado de retribucións e retencións da empresa ou empresas nas cales estivese de alta no exercicio económico previsto na correspondente convocatoria, de ser o caso.
      2. Certificado de pensións ou prestacións periódicas, emitido polo correspondente organismo oficial, no caso de non ser outorgadas polo INSS relativo ao exercicio económico previsto na correspondente convocatoria, de ser o caso.
      3. Certificados bancarios de rendementos de capital mobiliario, de ser o caso.
      4. Certificado da contía percibida pola renda de integración social de Galicia, de ser o caso.
   6. No caso de ingresos obtidos no estranxeiro, copia da declaración similar á do IRPF autenticada pola correspondente delegación consular e, de ser o caso, o certificado acreditativo de equivalencia en euros do importe declarado.
   7. No caso de que na data de presentación da solicitude de renovación algunha das persoas integrantes da súa unidade de convivencia sexan propietarias ou usufrutuarias dalgunha vivenda en territorio español e non poidan dispoñer dela:
      1. Convenio regulador de separación ou divorcio ou sentenza que acredite dita circunstancia, de ser o caso.
      2. Documentación que acredite que a persoa solicitante ou algunha das persoas integrantes da súa unidade de convivencia non poden habitar a vivenda por calquera outra causa allea á súa vontade, de ser o caso.
      3. Informe técnico que xustifique a inaccesibilidade da vivenda por razón da discapacidade da persoa solicitante ou dalgunha das persoas integrantes da súa unidade de convivencia, de ser o caso.
   8. No caso de que na data de presentación da solicitude de renovación a persoa solicitante ou algunha das persoas integrantes da súa unidade de convivencia sexan propietarias ou usufrutuarias da parte alícuota dunha vivenda en territorio español, documentación acreditativa de que foi obtida por transmisión mortis causa.
3. A comprobación dos datos necesarios para a tramitación do procedemento de renovación efectuarase de conformidade co previsto no ordinal décimo terceiro desta resolución.
4. A contía da axuda renovada será a mesma que se viña percibindo, sen prexuízo do seu reaxuste, para os casos de minoración da renda a pagar e para os supostos de cambio de domicilio, conforme co disposto no ordinal vixésimo segundo. 

   Así mesmo, poderá axustarse a axuda que se viña percibindo en función da porcentaxe que lle corresponda, no suposto de variación do tramo de ingresos ou desaparición das circunstancias que posibilitaron o incremento do 10% adicional, con fondos autonómicos, previsto no punto 2 do ordinal noveno, sen que en ningún caso poida incrementarse o importe da axuda que se viña percibindo.

5. Para os efectos de determinar o cumprimento dos requisitos económicos no momento da renovación anual das axudas, utilizaranse o IPREM e os datos fiscais correspondentes ao período fiscal especificado na correspondente convocatoria.

Prazo de presentación de solicitudes

O prazo de presentación de solicitudes de concesión inicial da axuda, anexo I (código de procedemento VI483C), comezará o día 15 de xaneiro de 2024 e terminará o día 29 de febreiro de 2024 e, en todo caso, ao esgotamento das partidas orzamentarias contidas nesta convocatoria, o que será obxecto de publicación no DOG e na páxina web do IGVS mediante resolución ditada pola persoa titular da Dirección Xeral do IGVS.

Para solicitar a renovación da axuda as persoas interesadas deberán achegar no prazo que se sinale na correspondente resolución de concesión inicial da axuda o anexo III de solicitude de renovación da axuda (código de procedemento VI483D).