Portal IGVS

O IGVS, xunto coa empresa pública de Xestión de Solo de Galicia-Xestur, S.A., son os promotores principais de solo empresarial, urbanizados cos criterios máis actuais nas catro provincias galegas, ofrecendo solo empresarial en compravenda e/ou en dereito de superficie.

Todo comeza coa planificación programada das actuacións a través do Plan sectorial de ordenación de áreas empresarias na Comunidade Autónoma de Galicia, na que, despois dun estudo pormenorizado, analiza a falta de solo por diferentes áreas de influencia e programa actuacións novas e estratéxicas.

As actuacións recollidas no citado plan sectorial serán desenvolvidas, á súa vez, por plans de interese autonómico ou plans parciais, cando as actuacións estean xa recollidas no Plan xeral de ordenación municipal. O IGVS é o encargado do impulso e tramitación tanto do plan sectorial como dos plans de interese autónomico.

Unha vez aprobados os instrumentos urbanísticos correspondentes adquírese o solo do ámbito, dando a posibilidade, mediante a correspondente oferta pública, de adquirilo por mutuo acordo ou permuta. Pola potestade expropiatoria que goza o IGVS, en virtude do artigo 4.2 da Lei 3/1988, do 27 de abril, da súa creación, o restante solo que quede pendente de cada actuación será adquirido por este método, actuando como Administración expropiante en beneficio seu ou, no seu caso, a entidade que a promova, todo iso ao amparo da Lei 2/2016, do 10 de febreiro, do solo de Galicia, no Real decreto lexislativo 7/2015, do 30 de outubro, polo que se aproba o texto refundido da Lei do solo e rehabilitación urbana e no Decreto 143/2016, do 22 de setembro, polo que se aproba o Regulamento da Lei 2/2016.

Logo da correspondente urbanización, as parcelas resultantes serán ofertadas a todas as empresas que se queiran instalar, mediante o correspondente concurso público, no que tras a súa conclusión, as parcelas que resten por adxudicar seguirán sendo ofertadas.