Portal IGVS

1- Que é este programa?

Con este programa pretendese mobilizar o maior número posible de vivendas baleiras de titularidade privada para a súa incorporación ao mercado de alugamento a través dunha renda accesible.

O programa desenvolverase en colaboración cos concellos da Comunidade Autónoma de Galicia que soliciten a súa incorporación como entidade colaboradora, os cales contarán cunha plataforma informática implantada polo IGVS para o intercambio de información entre elas e o devandito organismo, e na cal figurarán as vivendas baleiras que se oferten en alugamento a través deste programa.

O PMVAC garantirá ás persoas arrendadoras das vivendas incluídas nel, un seguro que cubra o abono das rendas non pagadas, así como un seguro para a reparación dos danos que se ocasionen nas vivendas durante a súa vixencia, sempre que non sexan consecuencia do seu deterioro polo seu uso ou polo paso do tempo, e a asistencia xurídica durante o tempo de duración do contrato.

2- Como incorporar as vivenda neste programa?

Deberá presentarse, antes do 31 de decembro de 2025, a solicitude de incorporación no concello correspondente ao termino municipal onde estea a vivenda, sempre que teña a condición de concello colaborador.

3- Como buscar vivenda?

As persoas demandantes de vivendas que cumpran os requisitos para incorporarse ao PMVAC deberán inscribirse no rexistro de demandantes do concello colaborador correspondente.

Os concellos colaboradores propoñerá a formalización dos contratos de alugamento das vivendas incorporadas, tendo en conta:

• O número de orde da inscrición no rexistro de demandantes

• A adecuación das características da súa unidade de convivencia ás das vivendas dispoñibles.

• Poderán tamén valorar:

  • De ser o caso, a necesidade urxente de vivenda naqueles casos de emerxencia social.

  • Así mesmo, valorarase o feito de que a vivenda estivese xa arrendada ao abeiro do anterior programa de vivendas baleiras.

4- Que é necesario para poder acceder ao alugamento?

Poderán ser arrendatarias das vivendas incorporadas ao PMVAC as persoas maiores de idade que cumpran os seguintes requisitos:

a) Contar coa credencial vixente da súa inscrición no Rexistro Único de Demandantes de Vivenda da Comunidade Autónoma de Galicia como demandantes, en réxime de alugamento, ben de vivendas de protección autonómica (VPA) de réxime especial ou xeral e/ou ben de vivendas promoción pública (VPP).

A documentación necesaria para a acreditación da devandita credencial deberá ser entregada pola persoa interesada na vivenda ao concello colaborador antes da formalización do correspondente contrato. Poderá exceptuarse este requisito nos casos previstos no ordinal vixésimo segundo.

b) Dedicar a vivenda alugada á súa residencia habitual e permanente durante todo o tempo de duración do contrato.

c) Que as súas unidades de convivencia teña uns ingresos comprendidos entre 0,7 e 1,5 veces o IPREM. Non obstante, poderá exceptuarse este requisito nos casos previstos no ordinal vixésimo segundo.

d) Que a renda da vivenda a arrendar non sexa superior ao 30% dos ingresos da súa unidade de convivencia.

e) Atoparse nunha situación persoal ou familiar que supoña unha dificultade para acceder a unha vivenda de aluguer.

f) Estar inscritas no correspondente rexistro do concello como persoas demandantes de vivenda.

g) Non estar incursas en ningunha causa de exclusión deste programa.

5- Como se determinan os ingresos da unidade de convivencia?

Calculando o rateo mensual dos ingresos netos correspondentes a cada un dos seus membros durante os 3 meses anteriores ao da presentación da solicitude, e aplicaráselle o coeficiente multiplicador corrector, en función do número de membros da unidade de convivencia:

• Familias de 1 membro: 1,00.

• Familias de 2 membros: 0,90.

• Familias de 3 membros: 0,80.

• Familias de 4 membros: 0,75.

• Familias de 5 ou máis membros: 0,70.

Valoraranse os ingresos da unidade de convivencia e deberán quedar incorporados en concepto de persoas arrendatarias no contrato de arrendamento todas aquelas que se tiveron en conta os seus ingresos para o cálculo económico.

6- Que máis documentación teño que presentar?

As persoas asinantes dos contratos de arrendamento deberán asinar unha solicitude para contratar os seguros da vivenda e unha autorización de consulta e cesión dos datos necesarios para a súa tramitación.