Portal IGVS

Santiago de Compostela, 22 de xaneiro de 2025

A Xunta deu conta hoxe das medidas lexislativas e fiscais activas xa desde o 1 de xaneiro deste ano, para promover a construción e rehabilitación de vivendas e incentivar e axilizar os trámites para a súa posta no mercado.

O conselleiro de Facenda e Administración Pública, Miguel Corgos, e a conselleira de Vivenda e Planificación de Infraestruturas, María Martínez Allegue, expuxeron hoxe no Foro Construír Xuntos, organizado no Palexco, na Coruña, as modificacións normativas do Goberno galego para dinamizar o mercado da vivenda.  Neste foro sectorial, tamén participou o secretario xeral de Vivenda e Urbanismo, Heriberto García Porto.

Na presentación das medidas, a responsable de Vivenda salientou o traballo da Xunta para dar solución a milleiros de familias, poñendo en valor que “nunca se fixo tanto, en tan pouco tempo”. Incidiu no “ritmo de licitacións abrumador, e tamén o ritmo de execución de obra”, no compromiso da Xunta de duplicar o parque público de vivenda, ata chegar ás 8.000; tendo xa máis de 1.700 vivendas en distintas fases de execución. A semana pasada púxose a primeira pedra dun edificio de Vivenda de Promoción Pública (VPP) en Xuxán (A Coruña), e se fixo o mesmo en Navia (Vigo).

Lembrou como a Xunta vén de licitar, cun orzamento de 8,2M€ (7,4M son propios fondos da Xunta, o resto fondos europeos), a execución das obras de rehabilitación de 8 edificios nos centros históricos de Ourense, Tui, Ribadavia, A Coruña e Viveiro, que permitirán a creación de 25 vivendas públicas. Estas vivendas, impulsadas no marco do proxecto para recuperar inmobles, o programa Rexurbe, ten permitido desde a súa posta en marcha a adquisición de 94 inmobles, cos que a Xunta prevé crear 167 vivendas nos concellos de Ourense, Tui, Mondoñedo, Lugo, Ribadavia, Viveiro, A Coruña, Vilalba, Ferrol, Betanzos e Ribadeo.

Por outra banda,  M. Allegue referiuse á nova Sociedade de Vivenda Pública de Galicia (Vipugal) que está xa a pleno rendemento, e tamén á 1ª fase da Estratexia de Solo Residencial na que a Xunta está inmersa e que facilitará a construción de 25.000 vivendas, 5.000 libres.

A conselleira fixo fincapé que para seguir avanzando é necesario tamén darlle unha volta, por exemplo, á lenta e farragosa burocracia, para o que a Xunta ten dado un paso máis para axilizar as ferramentas coma os Proxectos de Interese Autonómico (os PIAs), que permitirán reducir os trámites á metade; e as Certificacións ECCOM, que terán a mesma validez que os informes técnicos municipais, o que permitirá tamén aforrar tempo de tramitación aos concellos.

M. Allegue abundou nas medidas lexislativas e fiscais impulsadas pola Xunta, activas desde o 1 de xaneiro, co fin de axilizar trámites para incentivar a posta no mercado de vivendas, promover a rehabilitación e reducir taxas para edificios destinados a vivenda.

No que atinxe ás medidas lexislativas, a conselleira falou dos cambios na Lei de Vivenda de Galicia, por exemplo, establecendo a cualificación indefinida e permanente do réxime de protección das VPP e das Vivendas de Protección Autonómica (VPA) que se constrúan nun solo desenvolvido por promotor público a partir da entrada en vigor desta norma.

Citou, ademais, outras medidas, como a da simplificación dos requisitos para a conversión de baixos en vivendas ou a modificación do réxime especial para o remate de vivendas inacabadas (esqueletos), para o que poderá solicitarse licenza de rehabilitación ata 2028, tendo en conta que os novos edificios terán que destinar, como mínimo, a metade das novas vivendas a protexidas.

Segundo indicou M. Allegue, todas estas modificación perseguen incentivar a construción ou rehabilitación de vivenda. De tal xeito, que todas as medidas lexislativas  e fiscais, ás que suman outras coma as axudas a promotores, as convocatorias de axudas para adquisición de vivenda, para infravivenda, para concellos, ou para colectivos máis vulnerables, son “un conxunto de acción encamiñadas a dar resposta á principal preocupación da cidadanía que é o acceso á vivenda”, remarcou.

Novas medidas fiscais para este ano 2025

O conselleiro de Facenda e Administración Pública, Miguel Corgos, quixo lembrar a aposta continuada do Goberno galego ao longo dos anos para favorecer o aceso á vivenda, en especial aos mozos. Apuntou que as bonificacións fiscais para colectivos prioritarios aprobadas desde o ano 2016 permitiron un aforro de case 150M€ á cidadanía.

Miguel Corgos explicou que, para reforzar a aposta pola vivenda, os orzamentos deste ano inclúen novas medidas fiscais como a bonificación do 75% dos Actos Xurídicos Documentados (AXD) para adquirir, construír e rehabilitar edificios destinados ao aluguer, de xeito que se incentive a oferta de vivendas en alugueiro. Ademais, as persoas que merquen locais comerciais para vivenda beneficiaranse tamén dos tipos reducidos en Imposto de Transmisións Patrimoniais (ITP) e AXD dos colectivos prioritarios.

Estas dúas medidas reforzan a rebaixa xa en vigor de tipos reducidos para a compra de vivenda para rehabilitación (6% de ITP e 4% en zonas pouco poboadas).

Ademais haberá unha dedución no IRPF, de 500 euros polo arrendamento de vivendas baleiras, así como un 15% máis para os gastos de rehabilitación dun inmoble baleiro para destinalo ao arrendamento como vivenda, por un importe máximo de 3.000 euros ao ano, durante tres exercicios.