Portal IGVS

Santiago de Compostela, 21 de xaneiro de 2024

A Xunta de Galicia mostra a súa decepción coa comisión multilateral de vivenda celebrada no día de hoxe e na cal os representantes do ministerio de Vivenda non aceptaron explicar as medidas anunciadas polo Goberno de España o pasado 13 de xaneiro, malia que a propia Xunta de Galicia solicitou formalmente, ao día seguinte do anuncio, que na orde do día da multilateral se incluíse dita explicación das devanditas medidas.

A resposta do ministerio á solicitude da Xunta, formulada o 14 de xaneiro, e doutras comunidades autónomas chegou pasadas as sete da tarde do 20 de xaneiro, indicando que o asunto non se incluía na orde do día por tratarse “de medidas de competencia estritamente estatal”, cousa que non é certa, xa que boa parte das medidas son aplicadas polos gobernos autonómicos no marco das súas competencias.

Unha vez máis, o Goberno fai caso omiso ás demandas das comunidades autónomas participantes na conferencia multilateral, e mantén o oscurantismo, negándolles información sobre as medidas anunciadas por Pedro Sánchez. A Xunta reitera unha vez máis que, para facer fronte aos problemas da vivenda é necesario o traballo conxunto de todas as administración, buscando solucións coordinadas, que non se logran con actitudes como a demostrada polo Goberno na conferencia celebrada hoxe.

Da mesma maneira, a hora para a que se convocou a reunión (12,00 horas) parece elixida para evitar a participación das 15 comunidades e 2 cidades autónomas que participan na mesma. De feito, tanto a Xunta como outras comunidades solicitaron o adianto da hora, que foi rexeitado polo ministerio.

O secretario xeral de Vivenda e Urbanismo da Xunta de Galicia, Heriberto García Porto, reclamou na multilateral claridade sobre a aplicación dos fondos europeos destinados a mellora enerxética das vivendas e construción de vivenda protexida, recordando que a Xunta leva tempo reclamando a transferencia de máis fondos, unha vez que xa foron executados os asignados a Galicia. Os representantes do ministerio non responderon a esta demanda.

Por outra parte, na conferencia tratouse sobre a creación dun grupo de traballo para realizar achegas e suxestións de cara á elaboración do próximo plan de vivenda. Neste asunto, a Xunta leva tempo reclamando que o plan de vivenda teñan en conta as propostas das comunidades autónomas, como organismos encargados da súa xestión e como coñecedores das necesidades reais de cada comunidade, que ademais confinancian as actuacións do mesmo. Por iso manifestou a súa dispoñibilidade a poñer a disposición do resto de comunidades autónomas as propostas enviadas xa no pasado mes de decembro, sendo Galicia unha das poucas comunidades autónomas que o fixeron.

O grupo de traballo afondará tamén nas necesarias modificacións da normativa urbanística para axilizar a tramitación dos proxectos, como xa fixo a Xunta de Galicia, no marco das súas competencias, coas melloras introducidas na lei de medidas para 2025.