VolverA Xunta licita por 2,6 M€ a redacción dos Proxectos de Interese Autonómico para facilitar solo para máis de 15.000 vivendas en sete concellos
A previsión da Xunta sitúa no 2028 o inicio das obras de urbanización dos solos escollidos para estas primeiras 15.110 vivendas do total de 25.000 previstas na Estratexia Galega de Solo Residencial
As empresas poderán presentar ofertas para a redacción dos PIA ata o 8 de xaneiro
Os ámbitos destes concellos onde se desenvolverá solo suman unha superficie total de 1,5 millóns de metros cadrados
En Santiago estímanse 3.460 vivendas, mentres que na Coruña prevense 4.310; 160 en Arteixo, 1.200 en Lugo, 1.640 en Ourense, 2.040 en Pontevedra e 2.300 en Vigo
- Compartir
-
-
-
Santiago de Compostela, 29 de novembro de 2024
O Instituto Galego de Vivenda e Solo da Xunta vén de licitar hoxe, por un importe de 2,6 M€, a redacción dos Proxectos de Interese Autonómico (PIA) para o desenvolvemento de solo residencial para as primeiras 15.110 vivendas previstas na Estratexia Galega de Solo Residencial nos concellos de Vigo, Pontevedra, Santiago, Ourense, Lugo, A Coruña e Arteixo. Os ámbitos onde se desenvolverá solo suman unha superficie total de 1,5 millóns de metros cadrados, e a previsión da Xunta é a de iniciar no 2028 as obras de urbanización nas parcelas onde se construirá vivenda.
A licitación inclúe a redacción dos proxectos de interese autonómico, do proxecto de expropiación e de parcelamento para a obtención de solo destinado maioritariamente á construción de vivendas protexidas nos citados concellos. As empresas poderán presentar as súas ofertas con prazo ata o 8 de xaneiro.
En concreto, o solo que vai urbanizar a Xunta terá capacidade para aproximadamente 15.110 novas vivendas. Por concellos, urbanizarase solo para aproximadamente 3.460 vivendas en Santiago; 4.310 na Coruña; 160 en Arteixo; 1.200 en Lugo; 1.640 en Ourense; 2.040 en Pontevedra e 2.300 en Vigo. No caso da cidade compostelá, o ámbito escollido sitúase no solo urbanístico de Mallou, mentres que na Coruña elixiuse solo en Monte Mero; en Arteixo en Baiuca-Penouqueira; en Lugo no barrio Sagrado Corazón; en Ourense na zona Escorial-Vinteún; no concello de Pontevedra hai dous solos en San Mauro e, por último, en Vigo desenvolverase solo na zona do Ofimático.
A previsión da Xunta é ter adxudicados os contratos de redacción dos proxectos ao longo do vindeiro 2025, a fin de aprobar os PIA en xullo do 2026 e iniciar a continuación o proceso de expropiacións, entre ese ano e o 2027. Os proxectos de urbanización redactaranse entre febreiro e novembro de 2026 e, finalmente, as obras de urbanización comezarán no 2028.