VolverA conselleira de Vivenda de Planificación de Infraestruturas, María M. Allegue, xunto co secretario xeral de Vivenda, Heriberto García Porto, visitou a parcela na que se acometerán as novas vivendas de protección autonómica
A Xunta concede unha axuda de case 1,5 M€ para a construción en Santiago de 37 vivendas protexidas destinadas ao alugueiro
A empresa adxudicataria construirá estas vivendas nunha parcela localizada na contorna da Avenida Romero Donallo
A conselleira remarcou que esta empresa conta cunha axuda da Xunta enmarcada na convocatoria para incentivar aos promotores e cooperativas a construír inmobles para alugueiro accesible, dotada dunha partida global de 14,7M€
Lembrou que a Xunta licitará mañá a redacción dos Proxectos de Interese Autonómico e tamén para expropiacións e parcelamento, sendo Mallou o ámbito elixido en Santiago, con 35 ha e a previsión de 3.460 vivendas, das que 2.800 serán protexidas
Sinalou que en Santiago están en execución 3 grupos de vivendas de promoción pública, 24 no Castiñeiriño e dous edificios (24+12) en Lamas de Abade
Subliñou que os Orzamentos da Xunta para 2025 constan dun presuposto histórico de 240M€ destinado ás políticas de vivenda e urbanismo, a metade para construción de nova vivenda pública e adquisición de solo residencial
- Compartir
-
-
-
Santiago de Compostela, 28 de novembro de 2024
A Xunta concede unha axuda de 1.465.570€ a unha promotora galega para a construción en Santiago de Compostela de 37 vivendas protexidas destinadas ao alugueiro.
A conselleira de Vivenda e Planificación de Infraestruturas, María Martínez Allegue, xunto co secretario xeral de Vivenda e Urbanismo, Heriberto García Porto, visitou hoxe a parcela na que se van acometer estas vivendas, localizada na contorna da Avenida Romero Donallo.
O proxecto, cun orzamento total de 7,4M€, dos que case 1,5M€ se corresponden coa axuda outorgada pola Xunta, prevé a construción destas vivendas de protección autonómica, organizadas en dous portais.
Allegue subliñou que este proxecto permitirá dotar esta área de novos fogares funcionais, de calidade e coas características necesarias para acadar unha óptima eficiencia enerxética.
Remarcou que esta intervención é froito da colaboración público- privada, pois a Xunta lanzou este ano unha convocatoria destas axudas para incentivar aos promotores e cooperativas a construír inmobles para alugueiro accesible, cunha partida global de 14,7M€.
Destacou que a Xunta é consciente das dificultades que están a ter os cidadáns no acceso á vivenda, especialmente nas cidades. Neste sentido, puxo en valor o traballo que está a facer o Goberno galego en distintas direccións, tanto na construción de vivenda pública como no desenvolvemento de solo residencial.
Respecto ao desenvolvemento de Solo residencial, avanzou que a Xunta licitará mañá a redacción de proxecto dos Proxectos de Interese Autonómico (PIAS) e tamén para expropiacións e parcelamento.
Apuntou que en Santiago o ámbito elixido é Mallou, con 35 hectáreas e a previsión de 3.460 vivendas, das que arredor de 2.800 serán protexidas.
En relación á execución de vivenda pública, recordou o obxectivo da Xunta para esta lexislatura, que é duplicar o parque ata as 8.000. Na actualidade, xa están en marcha máis de 1.600 vivendas de promoción pública, en distintas fases de tramitación e execución.
Concretou que en Santiago están en execución 3 grupos de vivendas, 24 no Castiñeiriño e dous edificios (24+12) en Lamas de Abade.
Todos estes avances son posibles grazas a unha aposta sen precedentes pola vivenda, que se amosa no Orzamentos da Xunta para 2025, cun presuposto histórico de 240M€ destinados ás políticas de vivenda e urbanismo, dos que a metade son para construción de nova vivenda pública e adquisición de solo residencial.