VolverA Xunta recibe 9 ofertas para a redacción de proxectos e dirección de obras para a construción de 43 vivendas de promoción pública en Navia, Vigo
A Consellería de Vivenda e Planificación de Infraestruturas ten licitado o contrato por un importe que rolda os 355.000 euros
Trátase do servizo de redacción de proxecto básico e de execución e dirección de obra para a construción de 43 inmobles, garaxes, rochos e locais na parcela IVA-16, do polígono 1 de San Paio
A Xunta segue a avanzar no compromiso para duplicar nesta lexislatura a vivenda pública, tendo xa en marcha ao redor de 1.500 vivendas públicas en diferentes fases de execución, das que 656 están en Navia, onde están previstas 1.600 vivendas
- Compartir
-
-
-
Santiago de Compostela, 21 de outubro de 2024
A Consellería de Vivenda e Planificación de Infraestruturas, a través do Instituto Galego de Vivenda e Solo, recibiu un total de nove ofertas para a redacción de proxectos e dirección de obras para a nova construción de 43 vivendas de promoción pública en Navia, en Vigo.
Este contrato, licitado por un importe de 354.671 euros, ten por obxectivo a adxudicación dos servizos de redacción de proxecto básico e de execución e dirección de obra para a construción de 43 vivendas, garaxes, rochos e locais comerciais na parcela M-IVA-16 do polígono 1 de San Paio de Navia. A parcela ten unha superficie de 1.407 m2 e está a ser urbanizada pola Xunta de Galicia.
Con este contrato, a Xunta segue a avanzar no compromiso para duplicar nesta lexislatura a vivenda pública ata acadar as 8.000, tendo xa en marcha en seis meses ao redor de 1.500 vivendas públicas en diferentes fases de execución, das que 656 están en marcha en Navia, onde están previstas 1.600 vivendas cun investimento xa executado de 190M€. Delas, 316 están con obra licitada ou adxudicada por preto de 51M€; 51 licitaranse proximamente e 289 teñen proxecto licitado, incluíndo as 68 do Polígono 2 cuxa redacción de proxecto saíu o pasado venres día 18 por máis de 630.000€.