VolverA conselleira de Vivenda e Planificación de Infraestruturas, María M. Allegue, xunto ao secretario xeral de Vivenda e Urbanismo, Heriberto García Porto, visitou hoxe o ámbito da actuación no Porriño
A Xunta anuncia a licitación da redacción do proxecto de interese autonómico no Porriño para habilitar solo para 300 vivendas
O Goberno galego escolle un ámbito que da continuidade á trama urbana, aproveitando as dotacións próximas e os servizos públicos
Das 300 vivendas, 240 fogares contarán con protección autonómica
A Xunta ten previsto crear zonas verdes na contorna do río Cudeiro, impulsando un novo espazo de lecer de calidade para a veciñanza
O investimento na licitación ascende a máis de 210.000€ e poderán presentarse ofertas a partir do próximo luns
- Compartir
-
-
-
O Porriño (Pontevedra), 13 de decembro de 2025
A Xunta publicará este luns a licitación, por un importe de 212.414 euros, da redacción do Proxecto de Interese Autonómico (PIA) no Porriño. O Goberno galego ten previsto habilitar solo para 300 vivendas, das que o 80% serán protexidas (240 fogares). O ámbito conta cunha superficie de 43.000m2.
A conselleira de Vivenda e Planificación de Infraestruturas, María M. Allegue, xunto ao secretario xeral de Vivenda e Urbanismo, Heriberto García Porto, visitou hoxe os solos, localizados na zona próxima ao pavillón municipal de deportes do Porriño.
O Consello da Xunta do 24 de novembro deu luz verde ao inicio da tramitación do expediente relativo á delimitación e declaración de interese autonómico das actuacións para habilitar solo nesta localidade pontevedresa.
Allegue explicou que a Xunta vai desenvolver este ámbito nunha zona próxima á trama urbana, aproveitando as dotacións próximas e os servizos públicos, e destacou a contorna dos solos, próximos ao río Cudeiro, onde está previsto crear unha zona verde respectando as especies autóctonas, impulsando así un novo espazo de lecer de calidade para a veciñanza.
Este novo PIA enmárcanse na Estratexia Galega de Solo Residencial que ten en marcha a Xunta, co obxectivo de desenvolver solo para 25.000 vivendas en Galicia, 20.000 protexidas e 5.000 libres. Actualmente o Goberno galego ten en tramitación once proxectos de interese autonómico en Pontevedra, Vigo (Ofimático), Vigo (Cantabria–Ramón Nieto), Ourense, Lugo, Arteixo, A Coruña, Santiago de Compostela, Vilagarcía de Arousa, Marín e O Porriño.
Allegue puxo en valor a aposta da Xunta polo crecemento urbano sostible e integrado das vilas e cidades e polo esforzo orzamentario na creación de solo e o impulso de vivenda pública nos Concellos que conforman as grandes áreas metropolitanas galegas como San Cibrao das Viñas, Ames, Arteixo ou Culleredo.