Portal IGVS

Santiago de Compostela, 21 de novembro 2025

A conselleira de Vivenda e Planificación de Infraestruturas, María M. Allegue, pide ao Ministerio de Vivenda e Axenda Urbana xestionar as vivendas da Sareb para integralas no parque público residencial de Galicia, despois de que o Ministerio anunciase que sacará a concurso a xestión de 40.000 vivendas da Sareb.

Allegue, xunto ao secretario xeral de Vivenda e Urbanismo, Heriberto García Porto, cuestionou que “o Goberno central pretende que unha inmobiliaria vaia poñendo á disposición da cidadanía estas vivendas en forma de alugueiro”.

Neste senso, a conselleira cuestionou que este procedemento “sen consenso nin diálogo” no garante a cualificación destas vivendas como públicas, “non terán prezos máximos de renda nin de venda” e obrigan aos cidadáns a apuntarse nun rexistro diferente ao xa existente en Galicia. “Isto xera confusión", afirmou.

Lembrou que múltiples ocasións, a Xunta ten solicitado a través de cartas, reclamacións nas reunións bilaterais, multisectoriais e sectoriais mantidas co Ministerio a cesión de máis vivendas, demanda tamén recollida desde o Parlamento galego. De feito, no último debate anual sobre política xeral celebrado en abril na Cámara, aprobouse por unanimidade unha resolución para instar ao Ministerio esta cesión, que evitaría “a utilización de 55M€ das arcas públicas a esas empresas privadas, cando poden facelo as comunidades”.

Allegue recordou que ata agora, ante a reiterada falta de resposta para a cesión de vivendas e solos da Sareb, a Xunta optou por adquirir vivendas da citada sociedade e acordar cos concellos directamente a cesión de parcelas urbanas para seguir construíndo vivenda pública.  “Porque cando as administracións dialogan pensando só  no beneficio dos cidadáns, podemos chegar a acordos. Senón, só temos disputas estériles que non se entenden sobre todo neste contexto de falla de vivenda accesible”, afirma.

Incumprimento lei estatal

Pola súa banda, o secretario xeral de Vivenda e Urbanismo, Heriberto García Porto advertiu que coa medida anunciada, o Ministerio está a realizar “un manifesto incumprimento “ da propia Lei estatal de vivenda, que busca impulsar a promoción de vivenda protexida, obriga ás comunidades á adxudicación a través dos seus propios rexistros de demandantes e propón da colaboración entre administracións.

Hai que sinalar que Galicia fora en 2015 unha das primeiras comunidades en asinar coa Sareb un convenio para a xestión, en usufruto, de medio centenar vivendas da súa propiedade, que foron adxudicadas pola Xunta en alugueiro accesible. No ano 2023 a Administración autonómica adquiriu 40 con cargo a fondos do Plan Estatal de Vivenda destinados exclusivamente a este fin e cun investimento de máis de 3,9M€. Posteriormente, no 2024 adquiríronse outras 22 vivendas por preto de 2M€, das que 8 están situadas en grandes cidades (3 en Vigo, 3 en Lugo e 2 na Coruña) e o resto en Cee, O Barco de Valdeorras e Sarria.

García Porto apuntou que a petición da Xunta para a cesión de máis vivendas e solos tamén se efectuou sen éxito á nova sociedade estatal pública de vivenda, á que o Executivo central acordou traspasar estas vivendas da Sareb. E incidiu en que tampouco houbo resposta deste ente á petición da Administración autonómica para a cesión dos solos que foron licitados no marco do Proxecto Viena en Cangas e Ribeira, e cuxo concurso quedara deserto.