VolverA Xunta entrega dous locais da súa propiedade para acoller novas iniciativas empresariais en Garabolos e na Tinería
O delegado territorial do Executivo autonómico en Lugo, Javier Arias, explicou que se adxudican en réxime de alugamento “con rendas moi competitivas que facilitan a posta en marcha de novos negocios”
- Compartir
-
-
-
Lugo, 19 de novembro de 2025
A Xunta de Galicia fixo entrega en Lugo de dous locais da súa titularidade a senllos adxudicatarios que asentarán neles distintas actividades económicas. Os inmobles, situados nos barrios da Tinería e Garabolos, ofrécense en réxime de alugamento “con rendas moi competitivas que facilitan a posta en marcha de novos negocios”
Así o explicou o delegado territorial, Javier Arias, que entregou hoxe as chaves do local da Tinería á súa adxudicataria. Trátase dun espazo de 23,31 metros, na Travesía do Miño, no que se establecerá unha oficina de márketing.
O segundo inmoble que vén de ser adxudicado pola Administración autonómica atópase na avenida Paulo Fabio Máximo, ten preto de 74 metros cadrados e albergará unha tenda de nutrición deportiva. Ambas instalacións, propiedade do Instituto Galego da Vivenda e Solo (IGVS), están acondicionadas e contan cos servizos básicos necesarios para o seu uso.
Arias destacou que a oferta de baixos e locais comerciais no marco das promocións que executa o IGVS “ofrece interesantes vantaxes para emprendedores e empresarios, ao reducir custos de alugueiro ou reforma, entre outros”. Ademais, “axudan a dinamizar os barrios nos que se atopan”.
Ao respecto, lembrou que a Xunta “continua a traballar na rehabilitación urbanística, social e económica da Tinería, e un dos condicionantes fundamentais é atraer novos negocios á zona”.