VolverA titular de Vivenda visitou hoxe en Santiago un inmoble comprado a través deste liña financiada con fondos propios da comunidade autónoma, para a adquisición de vivenda en cascos históricos
A conselleira M. Allegue destaca o éxito da liña de axudas da Xunta para a compra de vivenda en conxuntos históricos, que beneficiará este ano a máis de 80 persoas cun investimento de 800.000€
A Xunta impulsa varias liñas de axuda para favorecer a compra de vivenda nestas zonas, que no caso de menores de 36 pode chegar aos 12.800 euros, e son compatibles co Aval Mozo, que cobre o 20 % do importe da compra
Desde a posta en marcha destas axudas en casco histórico concedéronse 313 axudas de apoio á compra de vivenda, achegas que se engaden a outras liñas de apoio á compra de vivenda protexida e adquisición en concellos de menos de 10.000 habitantes
A conselleira avanza que o proxecto de Orzamentos da Xunta para 2026 contempla un incremento do 13 % na partida das axudas á adquisición de vivenda
- Compartir
-
-
-
Santiago de Compostela, 17 de outubro de 2025
A conselleira de Vivenda e Planificación de Infraestruturas, María Martínez Allegue, fixo balance hoxe da convocatoria do 2025 da liña de axudas da Xunta para a compra de inmobles en centros históricos, que beneficiará este ano a 83 persoas cun investimento autonómico de 800.000 euros.
M. Allegue visitou hoxe unha das vivendas adquiridas a través da liña de axudas, financiadas integramente con fondos propios da Comunidade Autónoma, destinada a dinamizar os centros históricos e facilitar o acceso á vivenda en zonas patrimoniais, situada neste caso na rúa Pexigo de Abaixo, no corazón do casco vello de Santiago.
A Xunta impulsa varias liñas de axuda para favorecer a compra de vivenda nestas zonas, fomentando que os centros volvan encherse de vida. Neste caso, Álvaro, o propietario, recibiu unha achega de 12.800 euros, financiada exclusivamente con fondos propios da Comunidade Autónoma, por ser menor de 36 anos. Estas axudas son compatibles co Aval Mozo, que cobre o 20 % do importe non financiado polas entidades bancarias.
A conselleira destacou a importancia desta liña: É unha medida que facilita o acceso á vivenda para a mocidade e contribúe á revitalización dos centros históricos.
Durante este 2025, a Xunta concedeu 50 axudas para a compra de vivendas en conxuntos históricos e xa ampliou a dotación orzamentaria para atender outras 33 solicitudes adicionais, o que supón 83 beneficiarios este ano.
Desde a posta en marcha desta liña en 2019, concedéronse 313 axudas a compradores de vivendas en centros históricos de Galicia. Ademais, o Executivo galego mantén outras liñas de apoio á compra de vivenda protexida e adquisición en concellos de menos de 10.000 habitantes.
A conselleira avanzou que o proxecto de orzamentos da Xunta para 2026 contempla un incremento do 13 % a partida as axudas á adquisición de vivenda.