VolverA Xunta publica no DOG a delimitación do ámbito da Baiuca-Penouqueira en Arteixo, para desenvolver solo residencial onde construír 160 vivendas
A resolución implica a declaración do interese autonómico da actuación que se levará a cabo, no marco da Estratexia Galega de Solo Residencial que ten en marcha a Xunta
Están en redacción os PIA para desenvolver, ademais do de Arteixo, outros seis ámbitos en Pontevedra, Vigo, Ourense, Lugo, Santiago e A Coruña e a Xunta acaba de adxudicar os contratos de redacción dos de Vilagarcía e Ramón Nieto en Vigo
- Compartir
-
-
-
Santiago de Compostela, 13 de outubro de 2025
A Xunta vén de publicar no Diario Oficial de Galicia a delimitación do ámbito da Baiuca-Penouqueira, para desenvolver solo residencial, onde se poderán construír 160 vivendas.
A resolución recolle a aprobación da delimitación do ámbito de actuación identificado no planeamento xeral como UA 44, A Penouqueira, A Baiuca, situado sobre a ladeira do Monte Penouqueira, á altura do lugar das Carballas e con acceso desde a travesía de Arteixo, que será obxecto de transformación urbanística para a creación de solo destinado maioritariamente á construción de vivendas sometidas a algún réxime de protección pública en Pontevedra.
Estes proxectos enmárcanse na Estratexia Galega de Solo Residencial que ten en marcha a Xunta, co obxectivo de desenvolver solo no que facilitar a construción de 25.000 vivendas en Galicia, 20.000 protexidas e 5.000 libres.
Cómpre lembrar que están en redacción os Proxectos de Interese Autonómico (PIA) para desenvolver, ademais do de Arteixo, outros seis ámbitos en Pontevedra, Vigo, Ourense, Lugo, A Coruña e Santiago de Compostela, nos que construír 15.000 vivendas. E a Xunta acaba de adxudicar os contratos de redacción dos PIA en Vilagarcía e Ramón Nieto en Vigo para desenvolver solo onde se estima que se poderán construír ao redor de 1.800 vivendas.