VolverHeriberto García Porto interveu hoxe na Comisión 2ª do Parlamento de Galicia
O secretario xeral de Vivenda e Urbanismo acusa ao PSdG de buscar a confrontación, en lugar de reivindicar o mellor Plan estatal para Galicia
O secretario xeral de Vivenda e Urbanismo reiterou que a Xunta asumirá o cofinanciamento do plan nun 40%, o que supón quintuplicar a achega autonómica
García Porto recriminou a López Font que non sexa quen de apoiar as reivindicacións da Xunta para acadar un Plan Estatal de vivenda adaptado as necesidades de Galicia
Manifestou que o documento xa vai con retraso, polo que pode non estar operativo antes do segundo semestre do ano 2026
Fixo fincapé en que a Xunta ten en execución preto de 3.000 vivendas de promoción pública, das que ningunha recibiu fondos estatais
- Compartir
-
-
-
Santiago de Compostela, 7 de outubro de 2025
O secretario xeral de Vivenda e Urbanismo, Heriberto García Porto, interveu hoxe na Comisión 2ª do Parlamento, onde acusou ao PSdG-PSOE de buscar a confrontación, en lugar de reivindicar o mellor Plan Estatal de Vivenda para Galicia.
García Porto recriminou a José López Font que non sexa quen de apoiar as reivindicacións da Xunta para acadar un Plan Estatal de vivenda adaptado as necesidades da comunidade.
Reiterou que a Xunta asumirá o cofinanciamento do plan nun 40%, o que supón quintuplicar a achega da Xunta, un esforzo orzamentario que Galicia está disposta a asumir, pero ante unha programación consensuada.
Lembrou que o Goberno galego dirixiu cartas á ministra de Vivenda manifestando a dispoñibilidade da Xunta a asumir a aportación do 40% e indicando a necesidade de dispoñer dun borrador do plan. Ata agora non houbo resposta do Ministerio.
Recordou que esta vontade da Xunta tamén se reiterou na reunión bilateral mantida co director xeral de Vivenda do Ministerio en xuño e na multilateral de xullo co secretario de Estado e os directores das outras comunidades. De novo, trasladouse a mesma disposición na comisión bilateral de setembro e na conferencia sectorial de outubro.
García Porto desmentiu que o Goberno ofrecera 380M€ a Galicia, ao abeiro do plan, pois o Estado fixou unilateralmente un importe global de 7.000M€ e acordou que o reparto das aportacións debía ser dun 60% a nivel estatal e dun 40% autonómico. Neste sentido, a Galicia corresponderíanlle 399M€, dos que o Goberno achegaría 239M€ e a Xunta 160 M€.
Lamentou que a Xunta, a tres meses da finalización do vixente plan e sen participación das CCAA remita un borrador coa mensaxe pública de que se pretende aprobar en decembro deste ano. O Goberno galego remitiu de novo as reivindicacións que vén realizando dende decembro de 2024 para que se inclúan no plan as prioridades de Galicia.
Manifestou que o plan xa vai con retraso, polo que pode non estar operativo antes do segundo semestre do ano 2026.
Por outra parte, o secretario xeral fixo fincapé en que actualmente en Galicia a única administración que está a construír vivendas é a Xunta, que ten en execución preto de 3.000 vivendas de promoción pública, das que ningunha recibe fondos estatais.