Portal IGVS

Sarria (Lugo), 26 de setembro de 2025

A Xunta de Galicia adxudicou en alugueiro dúas vivendas de Sarria que adquiriu o pasado mes de decembro á Sareb e reformou co obxectivo de incrementar a oferta de pisos de promoción pública no municipio. Ambas están situadas na rúa Nova e constan de tres dormitorios, garaxe e rocho.

O delegado territorial de Lugo, Javier Arias, fixo hoxe entrega das chaves a unha das familias adxudicatarias, e destacou a axilidade coa que se executaron as xestións e as obras para poñer canto antes as vivendas a disposición dos demandantes.

A compra formou parte da adquisición por parte da Xunta de 22 vivendas á Sareb por un importe de 2.049.421 euros, situadas en distintos concellos galegos.