VolverO Consorcio Casco Vello de Vigo avanza na recuperación do Berbés coa rehabilitación dun edificio histórico
A delegada territorial da Xunta e presidenta do organismo autónomo, Ana Ortiz, visitou as obras de reforma en Ribeira do Berbés 39
- Compartir
-
-
-
Vigo, 25 de setembro de 2025
A delegada territorial da Xunta en Vigo e presidenta do Consorcio Casco Vello de Vigo (CCVV), Ana Ortiz, visitou este xoves as obras de recuperación do barrio histórico de O Berbés, onde avanza a rehabilitación dun inmoble en mal estado para poñer a disposición da cidadanía dúas vivendas de promoción autonómica.
O CCCV, participado nun 90% pola Xunta de Galicia, reforma actualmente o edificio situado no número 39 da Ribeira do Berbés, tamén con saída ao número 2 da rúa San Francisco, por un importe de 562.798,51 euros.
A nova rehabilitación permitirá construír dúas vivendas de 90 e 106 metros cuadrados no Berbés, onde o CCVV xa adquiriu dez edificios permitindo a creación ata este momento de 6 vivendas, xa habitadas tras a súa adxudicación. A estas seis, situadas nos números 29, 31 e 41, sumaranse agora as dúas do número 39.
Outros catro edificios foron cedidos polo Consorcio para a creación da sede urbana da Universidade de Vigo (na agrupación dos números 11, 13 e 15) e do Albergue de Peregrinos de Vigo, promovido pola Xunta de Galicia, no número 5. O Consorcio adquiriu tamén o edificio situado no número 7, actualmente xa baleirado.