VolverA conselleira incidiu hoxe no Pazo do Hórreo que a Xunta “foi a primeira administración en actuar” na defensa dos dereitos dos cooperativistas de Galivivienda en Xuxán, na Coruña
A conselleira María M. Allegue esixe ao Ministerio de Vivenda e Axenda Urbana que garanta a prórroga dos fondos europeos ás promocións das cooperativas en Galicia
Allegue pon o acento na necesidade da prórroga dos fondos MRR para non frear as promocións cooperativas como a de Xuxán (na Coruña) ou á das 27 vivendas prevista en Vigo, que non chegarán a tempo se non se amplían os prazos
Lembra que a Xunta foi a primeira en reaccionar no caso da cooperativa de Xuxán, mantendo contacto permanente coa xestora Galivivienda, os socios, o ICO e a ministra de Vivenda
Pon o acento na transparencia e dilixencia nas actuacións da Xunta, desde a licitación do concurso “público e transparente” do ano 2023, no que Galivivienda resultou adxudicataria de 224 vivendas protexidas en alugueiro, ata lograr a rectificación no préstamo do ICO
Reitera que a Xunta non permitirá desvirtuar os alugueiros accesibles, taxados por normativa, polo que se fose necesario recuperarase o solo público
A titular de Vivenda pide aos grupos da oposición que defenda en Madrid os intereses de Galicia e se sumen á reclamación da Xunta perante o Ministerio para asegurar, “dunha vez por todas”, a prórroga dos fondos europeos
- Compartir
-
-
-
Santiago de Compostela, 24 de setembro de 2025
A conselleira de Vivenda e Planificación de Infraestruturas, María M. Allegue, reiterou hoxe no Pazo do Hórreo a reclamación ao Ministerio de Vivenda e Axenda Urbana da prórroga dos fondos europeos MRR, para garantir a execución das promocións de vivenda cooperativa en Galicia.
Na súa intervención no Pazo do Hórreo, a conselleira referiu as actuacións levadas a cabo en defensa dos dereitos das persoas cooperativistas de Galivivienda en Xuxán, na Coruña. Incidiu na necesidade de que se garanta a dita prórroga dos fondos MRR vinculados a esta e outras promocións para que saian adiante. No caso de Vigo, por exemplo, hai 27 vivendas previstas que aínda non están iniciadas “e que non chegarán a tempo se non se prorrogan os prazos”, sinalou.
A conselleira lembrou que a Xunta foi a primeira administración en actuar, mantendo contacto permanente coa cooperativa Galivivienda, cos socios, co ICO e coa ministra de Vivenda. “Fomos a única administración que estivo do lado dos cooperativistas desde o primeiro momento. As hemerotecas están aí para demostralo”, tal e como ilustrou na súa intervención no Parlamento.
En contraposición, a conselleira amosouse crítica ante a visita do director xeral de Vivenda do Ministerio á Coruña a instancias do Concello o 9 de maio, cualificada como “colmo da demagoxia”, cunha “viaxe relámpago sen ningunha solución real”.
Pasos dados
María M. Allegue deixou claro os pasos dados pola Xunta, desde o ano 2023, cando se licitaron en Xuxán parcelas para vivenda protexida en alugueiro, “nun concurso público, transparente e con canon simbólico”. Nese concurso, Galivivienda resultou adxudicataria de 224 vivendas, e nese mesmo exercicio, xestionáronse tamén os fondos europeos MRR, asinándose á promoción 10 M€.
Lembrou que posteriormente, en decembro de 2023, a cooperativa iniciou a tramitación do financiamento co ICO, que en abril de 2025, o organismo estatal modificou de forma unilateral, o que supuxo un incremento inasumible das cotas para os cooperativistas. Ante esta situación, tal e como lembrou a conselleira, a Xunta reaccionou de maneira inmediata, mantendo contacto permanente cos socios da cooperativa, coa ministra de Vivenda e co director xeral do Ministerio. Ademais, enviou ata catro cartas reclamando unha solución. “Grazas á nosa insistencia, o ICO rectificou e volveu ás condicións iniciais”, subliñou.
A conselleira advertiu de que agora resta un paso fundamental: que o Ministerio garanta a prórroga dos fondos europeos vinculados ás promocións, condición imprescindible para que as vivendas poidan estar executadas no prazo previsto, no verán de 2026. “Esa é a nosa prioridade".
Fixo fincapé en que a Xunta en Xuxán “non permitirá que se desvirtúen os alugueiros accesibles e taxados pola normativa autonómica”. Se iso chegase a suceder, engadiu, “o Goberno galego non terá problema en recuperar o solo público para garantir o interese xeral”. Ademais, lembrou que ningunha administración pode interferir nas relacións entre Galivivienda, como xestora, e os socios cooperativistas: “Non seremos nós quen defendamos á xestora. As diferencias internas deben resolverse nos seus órganos de goberno”.
A conselleira reclamou tamén hoxe no Parlamento máis transparencia ao Goberno central, lembrando que a día de hoxe non se coñece cantos préstamos concedeu o ICO dos 6.000 millóns anunciados: “en Galicia, ningún”, afirmou .
A titular de Vivenda alertou de que moitas operacións están paralizadas en comunidades de toda España “pola falta de clarificación dos prazos”, o que pon en risco a execución de diferentes promocións de vivenda cooperativa.
A conselleira convidou aos grupos da oposición a sumarse á reclamación que a Xunta mantén perante o Ministerio para asegurar, “dunha vez por todas”, a prórroga dos fondos europeos.
En definitiva, María M. Allegue fixo fincapé en como o prioritario non é sacar rédito político, senón garantir a prórroga dos fondos europeos. “Aproveiten os escanos que teñen en Madrid —mentres lles duren— e actúen para saber por que non se garante xa publicamente a prórroga dos fondos. Aí está a clave. Defendan dunha vez por todas os intereses da nosa comunidade ante un presidente Sánchez experto en mirar para outro lado”, concluíu