VolverO presidente da Xunta de Galicia participou hoxe na entrega da Insignia de Honra da Federación Galega da Construción
Rueda destaca o papel do sector da construción para duplicar o parque público de vivenda nesta lexislatura
Subliña que a Xunta declarou o sector como estratéxico no mes de febreiro, unha decisión avalada polo seu peso económico, representando preto do 5,7% do PIB autonómico, e profesional, con milleiros de postos
O informe “Licitación Galicia”, elaborado pola propia Federación, reflicte un incremento do 36% nas licitacións da Xunta no sector entre xaneiro e xullo deste ano, ata acadar os 330 millóns de euros
Recoñece as dificultades do sector ante a falta de man de obra cualificada e o absentismo, e sinala o apoio da Administración galega á construción industrializada para gañar en axilidade, eficiencia e seguridade e abrir novas oportunidades laborais e formativas
- Compartir
-
-
-
Santiago de Compostela, 24 de setembro de 2025
O presidente da Xunta de Galicia, Alfonso Rueda, acompañado pola conselleira de Vivenda e Planificación de Infraestruturas, María Martínez Allegue, participou hoxe na entrega da Insignia de Honra da Federación Galega da Construción, onde destacou o papel do sector da construción para duplicar o parque público de vivenda nesta lexislatura.
Durante o acto, Rueda salientou que a Federación leva décadas sendo a voz dunha actividade clave para a Comunidade, defendendo aos seus asociados, actuando como interlocutora ante as administracións e formulando propostas realistas e comprometidas.
O titular do Goberno galego destacou que a construción é un sector “cada vez máis complexo, variado e necesitado de dinamismo”, un motor “económico e de cohesión”, tamén parte da marca Galicia Calidade. Neste sentido, lembrou que no mes de febreiro foi declarado polo Consello da Xunta como estratéxico, unha decisión avalada “polo que significa o sector da construción en Galicia” tendo en conta os seus datos de actividade, xa que supón arredor do 5,7% do PIB galego e emprega a milleiros de profesionais.
En materia de vivenda, o presidente indicou que este é un dos grandes compromisos da lexislatura “que necesitan ser executados”, e que a Xunta puxo en marcha unha estratexia ambiciosa para duplicar o parque público residencial, de 4.000 a 8.000 vivendas. Explicou que preto de 3.000 xa están en marcha, das que 825 se atopan en obras, cun investimento de 451 millóns de euros e 208 xa licitados. Ademais, están en tramitación nove proxectos de interese autonómico que permitirán habilitar 25.000 vivendas máis.
O informe “Licitación Galicia”, elaborado pola propia Federación, reflicte un incremento do 36% nas licitacións da Xunta no sector entre xaneiro e xullo deste ano, ata acadar os 330 millóns de euros. Neste senso, Rueda subliñou o impulso de obras públicas estratéxicas, como novas autovías ou infraestruturas de mobilidade sostible, que buscan mellorar a vida cotiá da cidadanía e reforzar a competitividade económica da Comunidade, e tamén destacou a importancia da colaboración público-privada.
Ademais, o xefe do Executivo autonómico recoñeceu as dificultades que enfronta o sector, como a falta de man de obra cualificada ou o absentismo, e sinalou que a Xunta está a apoiar a construción industrializada para gañar en axilidade, eficiencia e seguridade, ao tempo que se abren novas oportunidades laborais, formativas e de innovación.