VolverA conselleira de Vivenda e Planificación de Infraestruturas clausurou esta tarde a asemblea do V Encontro anual da Asociación Provincial de Empresarios da Construción da Coruña
A conselleira María M. Allegue destaca o esforzo compartido da Xunta e do sector da construción no impulso da vivenda pública e infraestruturas máis seguras en Galicia
Subliña o intenso ritmo licitador que está a desenvolver a Xunta co obxectivo principal de duplicar o parque público residencial, tendo xa en marcha preto de 3.000 novas vivendas
O departamento que dirixe María M. Allegue leva licitados 208 M€, cun investimento total estimado de 451M€
Pon en valor o talento do sector galego da construción, competitivo e comprometido, que conta co selo Galicia Calidade, que ademais, o pasado mes de febreiro foi declarou como estratéxico pola Xunta, e que achega o 5,7% do PIB autonómico
A conselleira lembrou o esforzo licitador da Xunta, con 98M€ licitados pola Axencia Galega de Infraestruturas para obra civil entre xaneiro e xullo, 54M€ polo Instituto Galego da Vivenda e Solo e 34,7M€ pola Consellería de Vivenda e Planificación de Infraestruturas en edificación residencial e non residencial
- Compartir
-
-
-
A Coruña, 18 de setembro de 2025
A conselleira de Vivenda e Planificación de Infraestruturas, María Martínez Allegue, destacou hoxe na clausura da asemblea do V Encontro anual da Asociación Provincial de Empresarios da Construción da Coruña (Apecco), o esforzo compartido da Xunta e do sector da construción no impulso de vivenda pública e infraestruturas máis seguras en Galicia.
María M. Allegue destacou esta tarde, no encontro organizado por Appeco na Coruña, o intenso ritmo licitador que está a desenvolver a Xunta de Galicia co obxectivo principal de duplicar o parque público de vivenda, o que supón a construción de 4.000 novas vivendas.
Na actualidade, xa están en marcha preto de 3.000 vivendas públicas, das que 825 se atopan en obras. A Xunta leva licitados 208 millóns de euros, cun investimento total estimado de 451 millóns de euros.
Ademais, están en tramitación 9 proxectos de interese autonómico destinados a habilitar solo para 25.000 vivendas.
Aposta pola industrialización e a innovación
A conselleira salientou as dificultades polas que atravesa o sector, entre elas a falta de man de obra, e subliñou a aposta da Xunta polo uso das técnicas de construción industrializada, que permitirán avanzar con maior axilidade e eficiencia. “Estamos nun punto de inflexión, nun momento crucial no que precisamos cambios e melloras para dar unha resposta máis rápida ás necesidades da cidadanía”, asegurou.
Tamén puxo en valor o talento do sector galego, competitivo e comprometido, que conta co selo Galicia Calidade, recoñecido en todo o Estado. Lembrou, ademais, que o pasado mes de febreiro o Consello da Xunta declarou como estratéxico o sector galego da construción, que achega o 5,7% do PIB autonómico.
Infraestruturas máis seguras
A titular autonómica destacou igualmente o esforzo da Xunta no eido das infraestruturas viarias na Coruña e detallou que tan só en actuacións de melloras de firmes xa se licitaron este ano obras por importe de case 24M€ nesta provincia.
Segundo o informe de Licitación Galicia da Federación Galega da Construción, entre xaneiro e xullo de 2025, a actividade licitadora da Xunta de Galicia que afecta ao sector creceu un 36% respecto do mesmo período do ano pasado, acadando os 328,7 M€.
Da citada cifra, 98M€ corresponderon a licitacións da Axencia Galega de Infraestruturas, para obra civil, 54M€ ao Instituto Galego de Vivenda e Solo e 34,7M€ á Consellería de Vivenda e Planificación de Infraestruturas, en edificación residencial e non residencial.
Recoñecemento ao sector
A conselleira concluíu agradecendo o compromiso e a calidade técnica do sector: “Quero felicitarvos polo voso traballo, pola vosa implicación, pola vosa visión estratéxica e pola vosa calidade. Estamos no bo camiño, e imos percorrelo xuntos”.