Portal IGVS

Rois (A Coruña), 11 de setembro de 2025

A conselleira de Vivenda e Planificación de Infraestruturas, María Martínez Allegue, destacou hoxe a importancia do pulo ás técnicas de construción industrializada, que sitúa a empresas como Arraigo na vangarda do sector en canto a innovación e dixitalización de procesos.

María M. Allegue realizou esta mañá unha visita ás instalacións da empresa con sede no polígono industrial das Grelas, no concello de Rois, para coñecer in situ o traballo desta firma, referente do ecosistema de vivenda verde e tecnolóxica en Galicia, que xorde da unión de tres socios e que centran a súa actividade na construción industrializada de vivendas modulares en madeira.

Esta visita enmárcase na aposta da Xunta pola aplicación das técnicas industrializadas como eixo crave para a innovación, a sostibilidade, a dixitalización, a trazabilidade no sector e como vía para aliviar a falta de man de obra especializada.

Neste momento, a Xunta ten en marcha varias promocións con técnicas industrializadas, no concellos de Vigo (en Navia); no de Mos, e no da Coruña (Xuxán), o que permite acelerar as obras e reducir os tempos na súa edificación

Cómpre recordar que o departamento que dirixe María M. Allegue, a través do Observatorio da Vivenda de Galicia, creou unha comisión técnica específica para incorporar paulatinamente sistemas de construción industrializada en Galicia, e dese traballo xurde o Plan director da construción industrializada que está a elaborar o Clúster da Construción.

Este plan terá 3 ferramentas: un mapa de capacidades produtivas, que xa se está a elaborar e se prevé difundir antes de finais deste ano; unha guía de Construción industrializada e un plan de fomento da industrialización, que se complementarán con formación.