VolverA conselleira de Vivenda e Planificación de Infraestruturas, María M. Allegue, asinou esta tarde un convenio co alcalde do municipio lucense, José Ángel Santos
O concello de Friol súmase ao programa da Xunta para mobilizar solos de titularidade municipal para a construción de vivenda de promoción pública
O convenio co Concello de Friol é o terceiro que se asina en Galicia, tras os rubricados cos concellos das Pontes de García Rodríguez e da Arnoia, e o primeiro na provincia de Lugo
O departamento que dirixe María M. Allegue pon a disposición do Concello Friol esta nova ferramenta que lle outorga apoio técnico para ofertar, mediante concurso público, unha parcela da súa titularidade, para a construción de ata 18 vivendas protexidas
Esta iniciativa da Xunta trata de axilizar a construción de vivenda protexida en solos de titularidade municipal, tanto en réxime de venda como en alugueiro
- Compartir
-
-
-
Santiago de Compostela, 10 de setembro de 2025
A conselleira de Vivenda e Planificación de Infraestruturas, María M. Allegue, vén de asinar hoxe co alcalde de Friol, José Ángel Santos Sánchez, o convenio enmarcado no Programa de oferta de solo de titularidade das entidades locais para a construción de vivenda protexida no municipio lucense.
A través deste convenio, asinado esta tarde en San Caetano, a Xunta pon a disposición do Concello de Friol esta nova ferramenta que lle outorga apoio técnico para ofertar, mediante concurso público, unha parcela de 6.679 m2 da súa titularidade, sita na Avenida da Coruña, para a construción de ata 18 vivendas de promoción pública.
Así, a Xunta sacará a concurso público en réxime de libre concorrencia esta parcela de titularidade municipal para a construción de fogares protexidos que poderían ser tanto en réxime de alugueiro como de venda. Ademais, deste xeito, facilitarase a información aos promotores, cooperativas e á cidadanía, en xeral, sobre os solos dispoñibles.
O Goberno galego, a través do IGVS, tamén se encargará da redacción dos pregos de bases, os anuncios de licitación, a mesa de contratación e a valoración técnica das ofertas, de maneira que o Concello só terá que ditar a resolución de adxudicación, ademais de participar na mesa de contratación.
O convenio con Friol é o terceiro que se asina en Galicia, tras o rubricado co Concello das Pontes de García Rodríguez e o Concello de Arnoia, e o primeiro na provincia de Lugo.
A conselleira recordou que o prazo para adherirse a este programa permanecerá aberto indefinidamente.