Portal IGVS

Cangas do Morrazo (Pontevedra), 10 de agosto 2025

A delegada territorial da Xunta de Galicia en Vigo, Ana Ortiz, visitou este mércores o barrio cangués de Nazaret onde será rehabilitado un edificio de catro vivendas grazas a unha achega do Instituto Galego de Vivenda e Solo (IGVS), dependente da Consellería de Vivenda e Planificación de Infraestruturas.

“Desde a Xunta seguimos a traballar nun dos obxectivos principais do mandato, que non é outro que facilitar o acceso da cidadanía á vivenda”, sinalou a representante autonómica. Así, apuntou que a rehabilitación de catro vivendas no número 1 do barrio de Nazaret resolveuse coa concesión dunha subvención ao Concello de Cangas para reformar as vivendas de titularidade municipal con destino ao alugamento social.

Ademais, indicou que se trata dunha subvención por un importe total de 200.000€ (40.000€ en 2025 e 160.000€ en 2026) para diferentes actuacións. A delegada estivo acompañada durante a visita pola alcaldesa de Cangas, Araceli Gestido, e o director territorial de Vivenda, José Manuel González.

Segundo engadiu Ana Ortiz, na planta baixa levarase a cabo a mellora do portal de acceso, cuartos de instalacións, escaleiras e dúas vivendas coa mesma distribución actual. Na planta primeira do inmoble, a rehabilitación incluirá as escaleiras e dúas vivendas coa mesma distribución e cuartos de instalacións comunitarias.

Tamén sinalou que a porcentaxe aplicada é do 95% do orzamento protexible sobre un investimento total de 372.639,31 € (74.527,86€ en 2025 e 298.111,45 € en 2026). O prazo máximo para acabar as obras é de 12 meses.