VolverA Xunta entrega dúas vivendas de promoción pública en réxime de alugueiro en Quiroga
O delegado territorial, Javier Arias, tamén lembrou que o Goberno galego habilitou axudas para reconstruír inmobles afectados polos incendios
- Compartir
-
-
-
Quiroga (Lugo), 9 de setembro de 2025
A Xunta entregou hoxe dúas vivendas de promoción pública en réxime de alugueiro na rúa Tallos de Quiroga. Ambas rondan os 82 metros cadrados de superficie e teñen tres dormitorios, praza de garaxe e rocho.
O delegado territorial de Lugo, Javier Arias, participou na entrega das chaves ás persoas adxudicatarias. Lembrou que tan pronto como unha vivenda queda vacante, o Instituto Galego da Vivenda e Solo (IGVS) inicia de inmediato o procedemento para volver ofertala seguindo o listado de adxudicatarios de cada concello.
Para formar parte destes listados é preciso inscribirse no Rexistro Único de Demandantes de Vivenda de Galicia. O prazo para presentar solicitudes está sempre aberto, tanto en liña como de forma presencial nas oficinas do IGVS.
Axudas para rehabilitación de vivendas afectadas por incendios
Así mesmo, Arias aproveitou para lembrar que a Xunta aprobou unha liña de axudas para a reconstrución das vivendas afectadas polos incendios. A contía para vivenda habitual pode acadar case 150.000 euros; e para segunda residencia ata 71.400 euros – incluída a achega por mobles ou enxoval doméstico -.
O delegado remarcou que a Xunta axilizará a tramitación para que estas persoas poidan recuperar canto antes as súas casas. Recordou ademais que Quiroga alberga unha das 16 oficinas habilitadas na Comunidade para asesorar nos trámites e axudar a presentar as solicitudes.