VolverA conselleira de Vivenda e Planificación de Infraestruturas, María Martínez Allegue, participou hoxe na reunión do consello de administración da Sociedade de Vivenda Pública de Galicia
A Xunta adxudica a redacción de proxectos e dirección de obra de 217 vivendas de promoción pública en Vigo, Ferrol, A Coruña, Pontevedra e Lugo
Os contratos inclúen tamén a dirección de obra
En Vigo e Ferrol as vivendas construiranse sobre solo urbanizado pola Xunta e na Coruña, Pontevedra e Lugo e parcelas cedidas polos concellos
- Compartir
-
-
-
Santiago de Compostela 8 de setembro de 2025
A conselleira de Vivenda e Planificación de Infraestruturas, María Martínez Allegue, participou esta mañá na reunión do consello de administración da Sociedade de Vivenda Pública de Galicia (Vipugal), que deu conta da adxudicación da redacción dos proxectos e dirección de obras de 217 vivendas de promoción pública nos concellos de Vigo, A Coruña, Pontevedra, Lugo e Ferrol.
No concello de Vigo adxudicouse a redacción dos proxectos e dirección de obra de 55 vivendas de promoción pública na parcela M-V-4 de San Paio de Navia, emprazada na etapa 2 que actualmente se atopa en fase de urbanización por parte do IGVS. O proxecto será redactado por Alberto Quintáns Arrondo, por importe de 349.671,44 euros.
En Ferrol tamén se construirán vivendas en solo urbanizado pola Xunta de Galicia, en concreto 58 na parcela 14 do polígono do Bertón. Encargarase do proxecto a UTE formada por Monteoliva Arquitectura, S.L.P e Fraga y Mantiñán Arquitectos S.L.P., por importe de 361.185 euros.
No resto de localidades as vivendas cuxos proxectos se adxudican levantaranse en parcelas cedidas polos correspondentes concellos.
Na Coruña serán 30 vivendas de promoción pública nas parcelas R3 e R4, emprazadas na rúa Pedro Fernández. O consello de Vipugal autorizou a adxudicación á UTE formada por Manuel Vázquez Muíños e Naos 04 Arquitectos, por importe de 248.050 euros.
Polo que respecta a Pontevedra, o proxecto para a construción de 11 vivendas na parcela P3 UA15, emprazada nas Devesas, será encargado á UTE formada por Manuel Vázquez Fariña e Manuel Rodríguez Fontán, por importe de 99.999,99 euros.
Finalmente, en Lugo serán 63 as vivendas que se constrúan nas parcelas 2, 3A, 3 B e 3C do polígono de Paradai. A redacción do proxecto adxudícase a Iglesias y Veiga Arquitectos, S.L.P. por importe de 317.337,02 euros.
Os adxudicatarios dispoñen de dous meses para a redacción do proxecto básico e tres máis para a redacción do de execución, aínda que os contratos manteranse ata o remate das obras ao incluír a dirección de obra.
Con estas novas adxudicacións a Xunta avanza cara o cumprimento do compromiso de duplicar o parque público de vivenda na presente lexislatura e xa son máis de 2.800 as vivendas de nova construción que se atopan en diversas fases de execución.