VolverA conselleira de Vivenda e Planificación de Infraestruturas, María Martínez Allegue, xunto o secretario xeral de Vivenda e Urbanismo, Heriberto García Porto, firmou hoxe en San Caetano esta colaboración coa alcaldesa do Concello de Mos, Nidia Arévalo Gómez
A Xunta facilita a adquisición de solo para 79 vivendas protexidas en Mos, a través dun préstamo sen xuros do Fondo de Cooperación por un orzamento de 1,2 M€
A Xunta concede ao Concello de Mos o crédito para á adquisición de 11 parcelas na zona de Tameiga–San Eleuterio, para construír novos fogares no municipio
Este Fondo de Cooperación é unha nova liña de actuación do departamento que dirixe María M. Allegue, que está dotada con 10 M€
O prazo para solicitalo rematará o 15 de outubro e se xestionará a través dun convenio entre o Instituto Galego da Vivenda e Solo e o concello destinatario do financiamento
- Compartir
-
-
-
Santiago de Compostela, 5 de setembro de 2025
A conselleira de Vivenda e Planificación de Infraestruturas, María M. Allegue, firmou hoxe en San Caetano coa alcaldesa de Mos, Nidia Arévalo Gómez, a concesión dun préstamo sen xuros, a devolver en 8 anos, de 1,2 M€ no marco novo Fondo de Cooperación para a construción de vivenda protexida da Xunta. No acto de sinatura tamén estivo o secretario xeral de Vivenda e Urbanismo, Heriberto García Porto.
En concreto, con este crédito concedido pola Xunta, o Concello ten como obxectivo a adquisición de 11 parcelas na zona de Tameiga–San Eleuterio, que suman unha extensión de 13.905,40 metros cadrados, coa finalidade de construír 79 novos fogares protexidos.
Este Fondo de Cooperación é unha nova liña de actuación do Goberno galego e está dotada con 10 M€. Ten como obxectivo o apoio ao financiamento da promoción de vivenda protexida de nova construción a todos os concellos de Galicia, independentemente dos seus habitantes. Poderá financiarse, sen xuros, total ou parcialmente, a promoción de vivenda protexida de nova construción, actuacións de urbanización dirixidas ao paso dun ámbito de solo da situación de rural a urbanizado para crear parcelas aptas para a edificación e a adquisición de solo para a promoción de inmobles de nova construción para a súa cualificación como vivendas protexidas.
O prazo para solicitalo rematará o 15 de outubro e se xestionará a través dun convenio entre o Instituto Galego da Vivenda e Solo e o concello destinatario do financiamento.
Esta liña de financiamento súmase ao Fondo de Cooperación para actuacións de rehabilitación e conservación do patrimonio construído en concellos de menos de 50.000 habitantes, dotado con 3,7 M€, que xa se ven convocando desde 2017.