VolverA conselleira de Vivenda e Planificación de Infraestruturas, María Martínez Allegue, xunto ao secretario xeral de Vivenda e Urbanismo, Heriberto García Porto, visitou hoxe a parcela que o Concello de Carballo cede gratuitamente á Xunta
Xunta e Concello de Carballo asinan a cesión de solo para a construción de 73 vivendas de promoción pública, no mesmo día que o Executivo galego licita a redacción do proxecto e dirección da obra
O Goberno galego estima en 14 M€ o investimento total neste novo inmoble
A conselleira anuncia que xa se publicou hoxe a licitación para a redacción do proxecto deste edificio, por un importe de 549.708,69€
- Compartir
-
-
-
Carballo (A Coruña), 25 de agosto do 2025
A conselleira de Vivenda e Planificación de Infraestruturas, María M. Allegue, xunto ao secretario xeral de Vivenda e Urbanismo, Heriberto García Porto, asinou hoxe o convenio para a cesión gratuíta dunha parcela para a construción dun edificio de promoción pública para 73 vivendas en Carballo. Situada na rúa Médico José Manuel Lado 18-20, conta cunha superficie de 1.998 metros cadrados.
M. Allegue anunciou, ademais, que hoxe mesmo publicouse no perfil do contratante a licitación da redacción do proxecto e dirección de obra do inmoble, por un importe de 549.708,69€. O investimento total estimado que fará a Xunta de Galicia nesta actuación é de 14 M€. A Xunta abordará a construción destes novos fogares a través da Sociedade de Vivenda Pública de Galicia.
A conselleira salientou a colaboración cos concellos para acadar máis solos para a promoción de vivendas públicas con acordos coas administracións locais de Lugo, Pontevedra, A Coruña, Vilagarcía, Ames, Lalín e A Estrada, entre outros.
A titular de Vivenda e Planificación de Infraestruturas destacou que o Goberno galego “ten un firme compromiso coa veciñanza de Carballo en canto ao acceso á vivenda” e recordou que se concederon 9 axudas de máis de 120.000 € á veciñanza para a adquisición de fogares.
Por último, M. Allegue salientou que a Xunta está a redobrar esforzos para facilitar o acceso á vivenda, a través de distintas vías. En canto á construción de nova vivenda protexida, o Goberno galego conta con máis de 2.800 fogares en marcha, en diferentes fases de tramitación.
A conselleira tamén destacou que a Xunta está a mobilizar vivenda baleira, co programa Fogar Vivo, en prazo para presentar solicitudes, con achegas de ata 16.000 €. Por último, fixo fincapé no desenvolvendo solo residencial para 25.000 vivendas, a través da Estratexia Galega de Solo Residencial.