Portal IGVS

Santiago de Compostela, 7 de agosto de 2025

A Xunta pide á Federación Galega de Municipios e Provincias (Fegamp) a súa colaboración para difundir entre os concellos o novo decreto que regula as Entidades de Certificación de Conformidade Municipal (ECCOM), que permitirá axilizar trámites para a construción de vivenda.

O Goberno galego vén de remitir unha carta asinada polos conselleiros de Presidencia, Xustiza e Deportes, Diego Calvo, e de Vivenda e Planificación de Infraestruturas, María M. Allegue, ao presidente da Fegamp, Alberto Varela, solicitando esta colaboración para divulgar esta nova normativa, que afecta de forma significativa á actuación dos concellos en materia urbanística e de vivenda.

O decreto entrará en vigor o vindeiro 17 de agosto, tras a recente publicación do texto no Diario Oficial de Galicia. 

A Xunta busca con esta nova normativa axilizar, simplificar e reducir prazos en materia de vivenda, sempre garantindo a seguridade xurídica e coa finalidade de incrementar a oferta de inmobles en Galicia. Deste xeito, a normativa desenvolve un novo marco legal aplicable ás ECCOM mediante unha regulación única, integral e pormenorizada do réxime xurídico destas entidades e do seu rexistro, facilitando así a súa accesibilidade por toda a cidadanía e as administracións públicas.

O decreto establece que nas solicitudes de licencia urbanística acompañadas dun certificado ECCOM, esta certificación terá a mesma validez e efectos que os informes técnicos e xurídicos municipais, que se entenderán substituídos por ditos certificados. A nova regulación será de aplicación xeral.

Entre as repercusións sobre a cidadanía que a presente norma procura están as de outorgar seguridade xurídica tanto aos particulares como aos concellos nos supostos en que se actúe a través dunha ECCOM.

Así mesmo, o obxectivo é tamén facilitar o coñecemento pola cidadanía das ECCOM autorizadas para exercer a súa actividade na comunidade autónoma mediante a creación do novo rexistro, xestionado pola Consellería de Vivenda e Planificación de Infraestruturas, competente en materia de urbanismo.

Estrutura

O decreto polo que se regulan as ECCOM e o seu rexistro consta de 51 artigos estruturados en cinco capítulos, que abordan o obxecto e ámbito de aplicación; as entidades de certificación de conformidade municipal; o seu rexistro; réxime de funcionamento e as obrigas e control destas entidades. Completan esta regulación dúas disposicións adicionais, unha transitoria, unha derrogatoria e dúas disposicións finais.

A normativa define os requisitos que deben cumprir as ECCOM para exercer a súa actividade na comunidade autónoma, así como as súas funcións, a documentación que deben emitir como resultado das súas actuacións e o réxime de responsabilidade das mesmas.

Regúlase tamén o rexistro destas entidades, determinándose os actos inscritibles, o procedemento de inscrición e os efectos e vixencia desta. Igualmente, establécense no decreto as obrigas das ECCOM e regulase o seu réxime de control, establecendo as prohibicións e incompatibilidades ás que están sometidas, así como o seu réxime sancionador.