VolverA conselleira de Vivenda e Planificación de Infraestruturas, María M. Allegue, visitou hoxe o inicio das obras dun inmoble de 24 vivendas en Ferrol
A Xunta inicia as obras dun edificio de 24 vivendas públicas no barrio do Bertón en Ferrol
O investimento nesta actuación suma un total de 6,4M€, dos que un 82% son fondos propios da Xunta
Polo menos un 40% destes fogares reservaranse para menores de 36 anos
A conselleira anuncia que se iniciarán as obras doutro inmoble de 24 vivendas no barrio ferrolán a próxima semana e que en 2028 serán unha realidade 363 fogares públicos no Bertón
Allegue destaca que o Goberno galego ten comprometidos máis de 80M€ en actuacións en vivenda na cidade
- Compartir
-
-
-
Ferrol (A Coruña), 30 de xullo de 2025
A Xunta vén de dar conta do inicio das obras dun inmoble de 24 vivendas de promoción pública en Ferrol. A conselleira de Vivenda e Planificación de Infraestruturas, María M. Allegue, visitou a parcela que albergará o inmoble, no barrio do Bertón. Os fogares resultantes formarán parte do parque público destinado a alugueiro accesible e destinaranse, polo menos un 40%, a menores de 36 anos. A previsión é que as obras rematen no último trimestre do 2026.
A conselleira destacou que o compromiso da Xunta con Ferrol é máximo “e proba delo é que o Goberno galego ten comprometidos máis de 80M€ en actuacións en vivenda na cidade, porque queremos colaborar co Concello para que Ferrol acade a posición que tiña como cidade, e que pouco a pouco está a recuperar”. M. Allegue tamén puxo en valor a cooperación da Xunta co Concello en materia de mobilidade sostible cos diferentes convenios asinados, tanto para Abrir Ferrol ao mar como para axudar na rexeneración urbana.
A conselleira de Vivenda e Planificación de Infraestruturas explicou que a próxima semana tamén se iniciarán as obras doutro inmoble de 24 fogares. M. Allegue indicou que outros 3 edificios xa en están en fase de redacción de proxecto, con proxectistas galegos “dunha altísima calidade técnica, que representan aos magníficos profesionais que temos nesta terra”. Por outra banda, a titular de Vivenda e Planificación de Infraestruturas informou de que xa se están a valorar ofertas para a redacción de proxecto doutros 2 edificios no Bertón. Salientou que a Xunta tamén ten en marcha 363 vivendas públicas no polígono de Bertón de Ferrol, dentro das máis de 2.800 en toda Galicia.
M. Allegue resaltou que o Goberno galego está a traballar ao máximo rendemento para atallar o problema do acceso á vivenda en toda Galicia, en contraposición ao desleixo do Goberno central. A conselleira lamentou que “a Xunta sigue agardando recibir información sobre o novo Plan Estatal de Vivenda para acadar máis fondos, máis recursos e as liñas de traballo para os vindeiros anos”.