VolverA Xunta recibe 3 ofertas para a redacción do proxecto para construír 30 vivendas públicas na rúa Pedro Fernández da Coruña
As vivendas construiranse en dúas parcelas desta rúa e súmanse as 58 proxectadas nos Rosais e 11 en Rei Abdullah, preto da praza Porticada, todas en terreos cedidos polo Concello da Coruña
A Xunta ten en marcha ademais 104 vivendas no barrio do Xuxán, cun investimento de 23,4M€
O Goberno galego avanza no reto de duplicar o parque público de vivenda nesta lexislatura, pois o obxectivo é ter 4.000 máis en 2028 e xa hai 2.800 en diferentes fases de execución
- Compartir
-
-
-
Santiago de Compostela, 24 de xullo de 2025
A Xunta vén de recibir 3 ofertas para a redacción do proxecto para a construción de 30 vivendas públicas en dúas parcelas da rúa Pedro Fernández, cedidas polo Concello da Coruña, por un importe de máis de 310.000€.
O Goberno galego ten tamén en proceso de licitación a redacción dos proxectos para 58 vivendas de promoción pública previstas na parcela dos Rosais e para 11 noutra parcela en Rei Abdullah, preto da praza Porticada, en terreos tamén cedidos polo Concello. O investimento autonómico estimado para as 98 vivendas estimadas nos solos dos Rosais, praza Porticada e Pedro Fernández, ascende a preto de 19M€.
Estes fogares súmanse ás 104 vivendas que xa están en marcha no barrio de Xuxán, nas que o Goberno galego leva investido 23,4M€.
A Xunta segue traballando para acadar o reto de duplicar o parque público de vivenda nesta lexislatura. O obxectivo é ter en 2028, 4.000 máis, e xa hai 2.800 en diferentes fases de execución.
Ademais, o Goberno galego está a avanzar na colaboración cos municipios para facilitar solo e habilitar novas promocións, e deste xeito xa está acordada a cesión de parcelas cos concellos de Pontevedra, Lugo, Vilagarcía de Arousa, Teo, Lalín e A Estrada. Ademais, progresan as xestións con concellos como Sanxenxo, Carballo, Narón, San Cibrao das Viñas ou Bueu.