Portal IGVS

Santiago de Compostela, 17 de xullo de 2025

A Xunta abre mañá o prazo de solicitudes do novo programa Fogar Vivo, que ten como finalidade mobilizar vivendas baleiras en réxime de alugueiro accesible. 

As peticións poderán presentarse dende mañá ás 9 horas ata o vindeiro 30 de outubro. As solicitudes realizaranse preferiblemente por vía electrónica, aínda que tamén se poderá efectuar de xeito presencial, dirixíndose e ao Instituto Galego da Vivenda e Solo (IGVS).

Este programa do Goberno galego está dotado dun orzamento de máis de 1M€ en 2025 e un total de 5,7M€ ata 2028.

Os propietarios que se acollan a esta iniciativa poden contar con contías máximas de ata 16.000 euros por vivenda, dos que 11.000 serán para rehabilitación e mellora da vivenda, incluíndo como novidade os gastos para renovar electrodomésticos como a lavadora, o lavavaixelas, o forno, a nevera, a campá extratora, a cociña e os sanitarios.

Poderán ser obxecto destas axudas as obras que se realizasen dende o 1 de xaneiro de 2025, sen que o prazo da súa execución poida, en ningún caso, exceder do 30 de maio de 2026.

Ademais se a vivenda se aluga a menores de 36 anos, persoas con fillos menores a cargo ou unidades familiares con persoas dependentes haberá unha axuda adicional de 2.000 euros, sempre que se obtivera a axuda de rehabilitación é mellora da vivenda.

Por último, os propietarios poderán solicitar, independentemente de que fagan reformas, 3.000€ para un seguro de impago e/ou multirisco.

Cómpre lembrar que as vivendas dos propietarios que queiran solicitar as achegas do programa Fogar Vivo non poden ter sido arrendadas nos tres meses inmediatamente anteriores á presentación da solicitude. Ademais, deberán destinarse ao alugamento accesible cando menos, durante cinco anos ou sete anos no caso de persoas xurídicas.