VolverA Xunta licita a redacción do proxecto para construír 24 vivendas públicas na rúa Angelo Collocci en Lugo, que suporán un investimento de 4,4 M€
A Plataforma de Contratos Públicos de Galicia recolle esta licitación, por importe de máis de 196.000€ e cuxo prazo de presentación de ofertas remata o 14 de agosto
O edificio habilitarase nunha das 6 parcelas cedidas polo Concello e estímase que a súa construción suporá un investimento de ao redor de 4,4M€
En relación ás outras parcelas cedidas, o Goberno galego xa ten en licitación a redacción dos proxectos para 63 vivendas en Paradai e para 50 de aloxamentos temporais e compartidos para menores de 36 anos na rúa Illa Coelleira
- Compartir
-
-
-
Santiago de Compostela, 16 de xullo de 2025
A Xunta licita a redacción dos proxectos básico e de execución e dirección de obra para a construción de 24 vivendas de promoción pública na rúa Angelo Collocci, en Lugo, que suporán un investimento estimado que roldará os 4,4 millóns de euros.
A Plataforma de Contratos Públicos de Galicia recolle esta licitación, por importe de máis de 196.000€ cuxo prazo de presentación de ofertas remata o vindeiro 14 de agosto.
O obxectivo é a construción dun edificio na parcela UA-N7, ubicada na rúa Angelo Collocci, unha das seis cedidas polos Concello de Lugo onde a Xunta prevé un total de 137 vivendas de promoción pública, cunha estimación de 20,9M€ de investimento.
En relación ás outras parcelas cedidas, o Goberno galego xa ten tamén en licitación a redacción dos proxectos para a construción de 63 vivendas de promoción pública na zona de Paradai. Ademais está en marcha a contratación da redacción do proxecto para executar 50 vivendas de aloxamento temporal e compartidos para menores de 36 anos na rúa Illa Coelleira.
A Xunta segue a traballar para incrementar o parque público residencial na cidade de Lugo, onde se están tamén a executar no barrio de Garabolos 4 inmobles que suporán máis de 460 vivendas protexidas, e no centro histórico, na rúa Catedral 18 e 22, rehabilitaranse 2 edificios ao abeiro do programa Rexurbe, para 2 fogares.
O Goberno galego tamén avanza no desenvolvemento da 1ª fase da Estratexia Galega de Solo Residencial, en colaboración cos concellos, para facilitar solo destinado á construción de 25.000 vivendas, 20.000 protexidas e 5.000 libres. En Lugo, o Executivo autonómico está a redactar o Proxecto de Interese Autonómico no ámbito do barrio do Sagrado Corazón, no cal se prevé a urbanización de solo para 1.200 vivendas.