VolverA Xunta recibe 5 ofertas para a redacción do proxecto para 11 vivendas na rúa Rei Abdullah, na Coruña
O investimento estimado previsto para a construción deste inmoble é de preto de 2M€
A Xunta xa ten en marcha na cidade da Coruña 210 vivendas públicas
O Goberno galego ten en redacción o Proxecto de Interese Autonómico no ámbito de Monte Mero, onde se prevén 4.310 vivendas
- Compartir
-
-
-
Santiago de Compostela, 10 de xullo de 2025
A Xunta, a través da Sociedade de Vivenda Pública de Galicia (Vipugal), recibiu 5 ofertas para a contratación da redacción do proxectos básico e de execución e dirección de obra por un orzamento de case 100.000 euros, para a construción de 11 vivendas de promoción pública na rúa Rei Abdullah s/n, na Praza Porticada. O investimento estimado do Goberno galego nesta actuación é de 1.995.000€.
O Goberno galego xa ten en marcha na Coruña 210 fogares públicos a través da construción de edificios para 99 vivendas públicas nos solos cedidos polo Concello nesta rúa, nos Rosais, e Pedro Fernández, os 104 fogares públicos en Xuxán, e a rehabilitación de inmobles do programa Rexurbe.
Ademais, a Xunta tamén ten en marcha a primeira fase da Estratexia Galega de Solo Residencial, coa que busca, en colaboración cos concellos, facilitar solo destinado á construción de 25.000 vivendas, 20.000 protexidas e 5.000 libres. No caso da Coruña, xa está en redacción o Proxecto de Interese Autonómico no ámbito de Monte Mero, onde se prevén 4.310 vivendas, o 80% delas protexidas.
A Xunta segue intensificando o ritmo de traballo no compromiso de incrementar o parque público residencial co obxectivo de duplicalo nesta lexislatura e acadar así 8.000 vivendas. Neste momento, xa ten en marcha máis de 2.500 vivendas nas cidades de Vigo, Pontevedra, A Coruña, Santiago, Ourense, Lugo, Ferrol, Mos ou Vilagarcía.